Korzinka супермаркетлари тармоғи янги форматдаги улгуржи савдо дўкони — Korzinka Biznes фолиятини йўлга қўяди. Бу ҳақда тармоқнинг Telegram каналида хабар берилди.

Маълум қилинишича, Korzinka Biznes’да юридик шахслар билан ишланади ҳамда кичик дўконлар ва ресторан-меҳмонхона бизнесига ҳар қандай мақсадлар учун осон ва тезкор харидларни амалга ошириш имконияти тақдим этилади.

Қандай қилиб Korzinka Biznes мижози бўлиш мумкин?

Korzinka Biznes мижози бўлиш учун тадбиркор ёки юридик шахс сифатида рўйхатдан ўтиш ва QR-кодли Korzinka Biznes клуби картасини олиш керак. Бунинг учун вакил орқали ёки дўконининг ўзида жойлашган маълумот столида рўйхатдан ўтишингиз мумкин.

Korzinka Biznes’да қандай қилиб товарларни сотиб олиш мумкин?

Товарларни харид қилиш учун Korzinka Biznes маълумотлар омборида тадбиркор ёки юридик шахс сифатида рўйхатдан ўтиш ва Korzinka клуби картасини олиш керак.

Товарларни бир неча усулда харид қилиш мумкин:

• Korzinka Biznes дўконига келиб, керакли товарларни танлаш ва корпоратив банк картаси орқали тўлов қилиш;
• дўкон ходимлари ёрдамида буюртмани расмийлаштириб, банк ўтказмаси орқали тўлаш;
• депозитни Korzinka Biznes ҳисоб рақамига ўтказиб, кейинчалик товарларни танлаш орқали харид қилиш.

Korzinka Biznes кимларга тўғри келади?

• қайта сотиш учун товар сотиб оладиган кичик савдо нуқталари, минимаркетлар, маиший хизмат кўрсатиш дўконлари эгалари;
• товарлардан овқат тайёрлашда фойдаланадиган кафе ва ресторанлар, тез тайёрланадиган таомлар ва умумий овқатланиш билан боғлиқ бошқа ташкилотлар эгалари;
• ўқувчи ва тарбияланувчиларни овқатлантиришда фойдаланадиган мактаб ва болалар боғчалари;
• офис эҳтиёжлари, ходимлар учун совғалар, корпоратив тадбирлар ва ўз фаолияти давомида юзага келадиган бошқа эҳтиёжлар учун товарлар сотиб оладиган ҳар қандай компания ва ташкилотлар.

Korzinka Biznes ва чакана супермаркетлар ўртасидаги фарқ нимада?

• товарларни фақат чекланган доирадаги карта эгалари — тадбиркорлар ва юридик шахслар вакиллари томонидан сотиб олиш имконияти;
• ҳар бир товар тури учун улгуржи нархлар ва улгуржи минимал харид миқдори;
• ассортимент — улгуржи харидлар учун энг кўп талабда бўлган товарлар. Фақат нақдсиз тўлов шакли;
• ишлаб чиқарувчининг қадоқлаш жойларидан товарларни сотиб олиш имконияти.