Транспорт вазирлигида Ўзбекистон авиа юк ташувлари соҳасида E-freight халқаро стандартини жорий этишни жадаллаштириш масаласига бағишланган йиғилиш бўлиб ўтди. Бу ҳақда вазирлик матбуот хизмати хабар берди.

Вазирлик маълумотига кўра, E-freight халқаро стандартини жорий этишдан мақсад мамлакатда ҳаво транспортида юк ташувлари рақобатбардошлигини ошириш, «Ягона дарча» тамойили асосида идоралараро маълумотлар алмашинувини йўлга қўйиш орқали бизнес жараёнларини соддалаштиришдан иборат.

Тадбирда тегишли вазирлик ва идоралар вакиллари авиа юк ташувлари соҳасида ҳужжатларни электрон расмийлаштириш ва кузатиб боришнинг E-freight халқаро стандартини жорий этиш йўналишидаги мавжуд муаммолар ва уларнинг ечими юзасидан фикр алмашди.

Маълум қилинишича, Халқаро авиация транспорти бирлашмаси тавсиясига мувофиқ ҳаво транспортида юкларни электрон расмийлаштириш ва кузатиш E-freight стандартини жорий этиш бизнес жараёнларини соддалаштиришга, харажатларни камайтиришга ва маълумот алмашинувини тезлаштиришга қаратилган халқаро тармоқ дастурининг бир қисмидир.

«Ушбу стандартнинг жорий этилиши ишончлилик даражаси ошишига, юкларни етказиб бериш вақтини ҳамда авиа юк ташувлари жараёнида ҳужжатларни электрон расмийлаштириш ва кузатиб бориш ҳаражатларини қисқартиришга хизмат қилади. Қолаверса, назорат қилувчи органлар учун ахборот хавфсизлиги ва ишончлилигини оширишни таъминлайди», дейилади хабарда.

Шунингдек, учрашув давомида илғор хорижий мамлакатларда ҳаво транспортида юк ташувларини расмийлаштириш жараёнида қўлланилаётган электрон платформаларнинг иш фаолияти юзасидан тақдимотлар ўтказилди. Йиғилиш ниҳоясида E-freight’ни тадбиқ этишни жадаллаштириш механизми ишлаб чиқилди.