Энди мобил рақамни бошқа шахс номига онлайн расмийлаштириш мумкин. Бу ҳақда Рақамли технологиялар вазирлиги хабар берди.

Бунинг учун Ягона интерактив давлат хизматлари порталида янги хизмат ишга туширилди. Ундан фойдаланиш учун my.gov.uz порталига кириб, «Телефон рақамини қайта расмийлаштириш» хизмати ни танлаш лозим.

Улардан мобил операторлар белгилаган тарифлар асосида хизмат ҳақи олинади. Хизмат 1−5 кун ичида кўрсатилиб, бунинг учун талабгорлардан ҳеч қандай ҳужжат талаб этилмайди.

Ариза берувчи Ягона порталда рўйхатдан ўтиб, ариза беради, унда рақамни қабул қилувчи тўғрисидаги маълумотлар кўрсатилади, шундан сўнг автоматик равишда тегишли сўров юборилади.

Абонент рақамини қабул қилувчи шахсий кабинетда хабарнома олади. Қабул қилувчи рақамни қайта расмийлаштириш сўровини тасдиқлайди ёки рад этади. Ариза берувчи сўров натижаси тўғрисида хабарнома олади. Қабул қилувчи сўровни тасдиқлаган тақдирда, ариза берувчи аризани якунлайди.

Ариза мобил алоқа оператори томонидан белгиланган тартибда кўриб чиқилади. Мобил алоқа оператори ариза тушган сўнг ариза берувчини хизмат кўрсатиш учун тўлов миқдори тўғрисида хабардор қилади.

Аввал рақам эгасини ўзгартириш учун ҳар икки томон (сотувчи ва олувчи) алоқа оператори марказига шахсан бориши талаб этиларди.