Ўзбекистонда IT виза бериш тартибига бир қатор янги талаблар киритилди. Бу ҳақда Адлия вазирлиги хабар берди.

Қайд этилишича, вазирлик IT соҳасидаги хорижий инвестор ва мутахассислар ҳамда ИТ Парк резидентлари таъсисчиларига тавсия бериш тартиби ҳақидаги низомга ўзгартиришларни давлат рўйхатидан ўтказди.

Янги тартибга кўра, IT виза ахборот технологиялари соҳасидаги хорижий инвесторлар ва мутахассисларга берилади.

Шунингдек, дастурий маҳсулотлар ва ахборот технологиялари технологик парки резидентларининг таъсисчилари, уларнинг яккабошчилик асосидаги ижро этувчи органи вазифасини бажарувчи шахслар олишлари мумкин.

Шу билан бирга, коллегиал ижро этувчи орган раиси ҳамда уларнинг ўринбосарлари ҳам ушбу визани олиш ҳуқуқига эга бўлади.

Қуйидаги шахсларга ҳам IT-visa берилади:

• ақамли стартаплар дастури иштирокчиси бўлган стартап лойиҳалар таъсисчилари (иштирокчиларига) ва мутахассисларига;
• олий таълим ташкилотларининг ахборот технологиялари соҳасида фан номзоди, фалсафа доктори (PhD) ёки фан доктори (DsC) илмий даражасига эга бўлган хорижлик профессор-ўқитувчиларига.

Шуниндек, IT-visa бериш учун бир қатор янги талаблар белгиланди. Жумладан, хорижий инвестор — Ўзбекистон резиденти бўлган ва ахборот технологиялари соҳасида фаолият юритаётган юридик шахсни $30 минг эквивалентидан кам бўлмаган миқдорда молиялаштиришни амалга оширувчи ёки ушбу юридик шахснинг устав фондидаги улуши миқдори камида $30 мингни ташкил этиши керак.

Технопарк резиденти мақомини олган юридик шахснинг таъсисчиси (иштирокчиси) бўлган ва ушбу юридик шахснинг устав фондидаги улуши миқдори камида $30 мингни ташкил этадиган жисмоний шахс бўлиши белгиланди.