YouTube’da yangi va hali yetarli darajada ommalashmagan kanallarni qoʻllab-quvvatlash uchun “hayp” (Hype – “shov-shuv” maʼnosidagi inglizcha soʻz) funksiyasi ishga tushiriladi.

Qayd etilishicha, “hayp” funksiyasi 500 mingdan kam obunachiga ega kanallar uchun ularning joylanganiga 7 kundan koʻp boʻlmagan videolarida ishlaydi. Yaʼni, obunachilari yarim milliondan kam boʻlgan kanal yangi videoni yuklasa, tomoshabinlarga video ostida “hayp” tugmasi koʻrinadi. Videoni tomosha qilganlar shu tugmani bosganda, oʻsha video uchun ballar yigʻilib boradi va tegishli kanal aloqador boʻlgan davlat boʻyicha eng yuqori oʻrindagi 100 ta video YouTube tomonidan tomosha qilish uchun tavsiya etiladi. Bunda bir YouTube hisobi bir haftada faqat uchta videoga “hayp” tugmasini bosa oladi.

Mazkur funksiya YouTube tarmogʻida millionlab obunachilarga ega kanallar soni tobora ortib borayotgan va yangi kanallar uchun ular bilan raqobatlashish qiyinlashayotgan bir paytda kichik kanallarni qoʻllab-quvvatlash uchun ishga tushiriladi. Shu bilan birga, har bir obunachi biron kanalning rivojiga oʻz hissasini qoʻshishni istasa, uni “hayp” orqali qoʻllashi mumkin boʻladi. Videolar ostidagi “hayp”lar miqdorini koʻrsatib turuvchi maxsus belgi orqali esa qaysi video koʻproq ommalashgani koʻrinib turadi.

Taʼkidlanishicha, ushbu tizim videohostingning layklar va izohlar bilan bogʻliq amaldagi algoritmlaridan farq qilib, asosiy eʼtibor kichik kanallarni ommalashtirishga qaratilgan.

“Hayp” imkoniyati Turkiya, Tayvan va Braziliyadagi 50 mingdan ortiq kanallarda sinovdan oʻtkazilgan. Hozircha ushbu funksiya jahon va Oʻzbekiston miqyosida qachondan boshlab ishga tushishi maʼlum emas.