BMTning Ijtimoiy va iqtisodiy masalalar departamenti (UNDESA) tomonidan tashkilotga aʼzo 193 davlat elektron hukumatining rivojlantirish holatini taqdim etuvchi «UN E-Government Survey»ning 2024-yilgi natijalari «Barqaror Rivojlanish uchun Raqamli Transformatsiyani kuchaytirish” nomi ostida e’lon qilindi.
Avvalgi 2022-yil natijalariga ko‘ra, O‘zbekiston mazkur reytingda 0,72 qiymat bilan 69-o‘rinni egallagan bo‘lsa, 2024-yilda 0,79 indeks hisobiga 6 pog‘onaga yuqorilab, 63-o‘ringa chiqdi.
O‘z navbatida, ilk marotaba O‘zbekiston baland elektron hukumatni rivojlantirish indeksi guruhidan (High EGDI) dan juda baland (Very High EGDI) guruhiga qo‘shildi.
Ushbu natija “Raqamli O‘zbekiston — 2030” strategiyasining maqsadli ko’rsatkichlarida 2025-yil uchun belgilangan 0,75 qiymatdan ham oshdi.
Ma’lumot uchun, EGDI o‘z ichiga uchta kichik indeks: telekommunikatsiya infratuzilmasi, inson kapitali va onlayn xizmatlar indekslarini o‘z ichiga olgan bo‘lib, Oʻzbekiston bu borada mos ravishda 0,87, 0,75 va 0,76 koʻrsatkichga ega.
