Telegram endilikda ilovadan noqonuniy maqsadlarda foydalanganlarning maʼlumotlari: ularning IP-manzillari hamda telefon raqamlarini tegishli organlarga taqdim etadi. Bu haqda messenjer asoschisi Pavel Durov oʻz Telegram-kanalida maʼlum qildi.

Xabarda aytilishicha, Telegram orqali qidiruv boshqa messenjer ilovalariga nisbatan xavfsiz boʻlgani uchun ayrim shaxslar tomonidan undan jinoiy maqsadlarda foydalanish holatlari uchraydi. Shu bois, Durov boshchiligidagi Telegram moderatorlari jamoasi soʻnggi haftalarda sunʼiy intellektdan foydalangan holda Telegram qidiruvini yanada xavfsiz qilish ustida ishlagan. Yangilangan foydalanish shartlari hamda maxfiylik siyosatiga koʻra, endi Telegram orqali qidiruvda “zararli” kanal va botlar foydalanuvchilarga koʻrinmaydi.

Shuningdek, qoidalarni buzgan obunachilarning (misol uchun ilovadan narkotik yoki noqonuniy qurol-yarogʻ sotish, pedofiliya, bolalarga qarshi jinoyatlar sodir etish kabi maqsadlarda foydalanganlar) IP-manzillari va telefon raqamlari rasmiy soʻrovga asosan davlat organlariga taqdim etiladi.

Eslatib oʻtamiz, Pavel Durov avgust oyi oxirida Fransiyaning Parij shahrida hibsga olinib, unga nisbatan “narkotiklar aylanmasi, bolalarga qarshi jinoyatlar va firibgarlik” kabi ayblovlar eʼlon qilingandi. Durov bu borada Fransiya huquq-tartibot idoralari bilan hamkorlik qilishdan bosh tortgan. Umuman olganda, Telegram faoliyatini boshlaganidan buyon hukumatlar bilan hamkorlik qilishni rad etib, hech bir foydalanuvchining shaxsiy maʼlumotlarini uchinchi tomonlarga, jumladan hukumatlarga taqdim etmay kelishi aytiladi.