Shu yilning 1-dekabriga qadar avtomobillarga gaz to‘ldirish shoxobchalari faoliyati haqida ma’lumot beruvchi mobil ilova ishlab chiqiladi. Bu haqda energetika vaziri Jo‘rabek Mirzamahmudov “Lolazor” podkastida aytib o‘tdi.

Vazir IT-kompaniyalar bilan tizim yuzasidan muhokama o‘tkazilgani, ayni paytda dastur ustida ish olib borilayotganini ma’lum qildi. Qayd etilishicha, tizim stansiyalarga tavsiyaviy asosda taqdim etiladi.

“Kim mobil ilova yoki bizning saytimiz orqali tizimga ulanadigan bo‘lsa, bu bepul bo‘ladi. Faqat, biz, ularning xarajatlarini qoplash maqsadida kompaniya bilan gaplashdik. Ular bilan Energetika vazirligi orqali shartnoma qilib, tizim va ilovani yaratib berish bo‘yicha kelishdik”, – deydi Jo‘rabek Mirzamahmudov.

Shuningdek, tegishli yoqilg‘i quyish shoxobchalari qo‘shimcha servisi yoki reklamasi uchun mobil ilovani ishlatsa, to‘lov bo‘ladi, ya‘ni ushbu ilovani ishlatish yoki ishlatmaslik yoqilg‘i quyish shoxobchalarining ixtiyorida bo‘ladi.

Mobil ilovada qaysi “zapravka»ga gaz chiqarilgani hamda ularning ish vaqti haqidagi ma’lumotlar real vaqt rejimida berib boriladi. Texnik sabablarga tufayli yopilgan AGTKShlar esa bundan mustasno bo‘ladi hamda “zapravka”lar tomonidan ma’lumotlarning taqdim etilishi majburiy bo‘lmaydi.