O‘zbekiston Markaziy Osiyodagi eng to‘q davlat deb topildi
Global ochlik indeksida O‘zbekiston ochlik xavfi past bo‘lgan eng yaxshi ko‘rsatkichga 22 davlatdan biri sifatida qayd etildi. Indeks bolalar o‘limi, ularning to‘yib ovqatlanishi va sog‘lom o‘sib-ulg‘ayishini hisobga olgan
O‘zbekiston global ochlik indeksi bo‘yicha reytingda 121 mamlakat orasida 21-o‘rinni qayd etdi. O‘zbekiston “5 dan kam” bal olib, “ochlik darajasi past” davlat qatoriga kirgan.
Indeks bolalar o‘limi, to‘yib ovqatlanmaslik va bolalarda o‘sishning sustlashishini hisobga oladi. Indeks qanchalik past bo‘lsa, mamlakatning reytingda pozitsiyasi shunchalik yuqori bo‘ladi va ochlik xavfi past hisoblanadi.
O‘zbekiston ushbu indeksning 2000-yilda e’lon qilingan reytingida ochlik darajasi “o‘rta” mamlakatlar qatoriga kiritlgan. Keyinchalik har sakkiz yil davomida olib borilgan o‘rganishlarda ochlik xavfi kamayib borgan.
Markaziy Osiyo mamlakatlari orasida O‘zbekiston yetakchilik qilgan, undan keyin Qozog‘iston (24-o‘rin), Qirg‘iziston (40-o‘rin), Turkmaniston (49-o‘rin) va Tojikiston (69-o‘rin) qayd etilgan. Belarus, Bosniya va Gertsegovina, Chilida eng past ochlik xavfi kuzatilgan.
Eng yomon ko‘rsatkich Somali, Yaman, Chad va Madagaskarda bo‘lib, ularda ochlik xavfi “xavotirli” deb topilgan.
