Prezident tomonidan «Paxta xomashyosi ishlab chiqarish va sotishda bozor mexanizmlarini qo‘llashni izchil davom ettirish chora-tadbirlari to‘g‘risida»gi farmon qabul qilindi.

Farmon asosida paxta xomashyosi narxi 2025-yil hosili uchun Tovar-Xomashyosi Birjasi tomonidan belgilanishi kerak. Bu narx, Nyu-York birjasidagi fyuchers kotirovkalarining o‘rtacha qiymatiga asoslanadi va Birjaning veb-saytida e’lon qilinadi. Bu narxdan past bo‘lgan narxda shartnomalar tuzilmasligi kerak.

Farmon bilan paxta ishlab chiqaruvchilari va qayta ishlovchilar o‘rtasida turli shartnomalar tuzish imkoniyati yaratiladi. Masalan, fyuchers, forvard va spot shartnomalari mavjud. Fyuchers shartnomalari 1-noyabr va 1-iyun oralig‘ida tuziladi, forvard shartnomalari esa 1 -noyabrdan 1-martgacha o‘zaro kelishilgan narxda imzolanishi mumkin. Spot shartnomalari esa ombordagi paxta xomashyosi miqdoriga qarab real vaqt rejimida tuziladi.

Paxta ishlab chiqaruvchilari uchun subsidiyalar tizimi ham joriy etiladi. 2025-yil hosilidan keyin, paxta xomashyosi sotgan va Birjada ro‘yxatdan o‘tgan xo‘jaliklarga shakllangan hisob-faktura qiymatining 10 foizi miqdorida subsidiyalar ajratiladi. Shuningdek, olingan imtiyozli kreditlar bo‘yicha foiz to‘lovlari 4 foizga kamaytiriladi va bu miqdor subsidiya sifatida qaytariladi.

Paxta xomashyosi bo‘yicha barcha shartnomalar va savdo operatsiyalari endi «Agroplatforma» axborot tizimi orqali amalga oshiriladi. Bu tizim barcha bitimlarni elektron tarzda boshqarishga imkon beradi va jarayonlarni yanada shaffof va tushunarli qiladi. Shuningdek, barcha savdolar Birja platformasida o‘tkaziladi.