Ўзбекистонда «Binance» крипто-платформаси расман иш бошлади
Фойдаланувчилар банк карталари орқали миллий валютада маблағларни тўлдиришлари ва ечиб олишлари мумкин.
Ўзбекистон криптоактивлар бозорида «Coinpay» ва «Binance» компаниялари ҳамкорлигида янги хизмат йўлга қўйилди. Бу ҳақда «Coinpay» маҳаллий криптобиржасининг матбуот хизмати хабар берди.
«Coinpay» ва «Binance» компаниялари ҳамкорлигида ташкил этилган қўшма платформа фойдаланувчиларга рақамли активлар билан ишлашда янги имкониятлар яратади. Лойиҳа Истиқболли лойиҳалар миллий агентлиги (ИЛМА) томонидан қўллаб-қувватланган ва мамлакат қонунчилигига тўлиқ мувофиқ тарзда амалга оширилган.
Платформа Ўзбекистон ҳуқуқий тизимига биринчи бўлиб киритилган расмий крипто-сервис сифатида фаолият юритишни бошлади. Фойдаланувчилар банк карталари ва маҳаллий тўлов тизимлари орқали миллий валютада маблағларни киритиш ва ечиб олиш имкониятига эга бўлдилар. Шунингдек, мижозлар «Binance»нинг кенг қамровли хизматларидан ҳам фойдалана оладилар.
«Coinpay» компанияси расмий веб-сайти орқали барча операцияларни амалга оширишни таклиф этмоқда. Крипто-активлар билан ишлашда ноқонуний ташқи платформалардан фойдаланиш тақиқланган бўлиб, бу юридик жавобгарликка тортилишга олиб келиши мумкин. Бундан ташқари, компания ўз мижозларига рақамли активлар савдосининг ўзгарувчан табиати туфайли юқори хавфлар мавжудлигини эслатиб, эҳтиёткорлик билан ёндашишни маслаҳат беради.
ИЛМА 2025 йилнинг январь ойида крипто-биржалар ўртасидаги ушбу ҳамкорликни расман эълон қилган эди.
Эслатма: 2024 йилда Binance крипто-биржаси Ўзбекистон қонунларига риоя қилмаганлиги сабабли агентлик томонидан жаримага тортилган эди. Суд жараёни якунида биржа 300 базавий ҳисоблаш миқдоридаги жаримани тўлаган.
