Ўзбекистонда 2024 йил якуни билан халқаро стандартлар асосида камбағаллик даражаси аниқланди. Бу ҳақда Камбағалликни қисқартириш ва бандлик вазирлиги хабар берди.

Унга кўра, 2024 йилда Ўзбекистонда камбағаллик даражаси 11 фоиздан 8,9 фоизга камайди (3,3 млн. киши ёки 2023 йилга нисбатан 719 мингга камайган).

Ушбу натижа – Жаҳон банки билан ҳамкорликда олиб борилган тадқиқотлар асосида аниқланган.

Камбағаллик даражаси энг юқори пасайишлар:

• Бухоро вилоятида — 11,8 фоиздан 8,7 фоизгача;
• Самарқанд вилоятида — 10,5 фоиздан 7,5 фоизгача;
• Наманган вилоятида — 10,4 фоиздан 7,6 фоизгача;
• Қорақалпоғистон Республикасида — 13,6 фоиздан 10,8 фоизгача қайд этилган.

2024 йилда аҳоли бандлигини таъминлаш, тадбиркорликка жалб қилиш, томорқа ва деҳқончилик учун ажратилган ер майдонларидан фойдаланиш самарадорлигини ошириш бўйича кўрилган чоралар мамлакатда камбағаллик даражасини пасайтиришга катта ҳисса қўшди, — дейилади хабарда.

Бунинг натижасида 2024 йилда аҳолининг реал даромади 10,7 фоизга ўсиб, жон бошига ойига ўртача 2,1 млн сўмдан тўғри келган (йил бошида – 1,7 млн сўм).

Жумладан, аҳоли даромадлари таркибида:

• иш ҳақи – 42,6 фоиз (2023 йилда – 41,9 фоиз);
• тадбиркорликдан даромадлар – 22,9 фоиз (21,4 фоиз);
• пенсия, ижтимоий ёрдам ва субсидиялар – 18,2 фоиз (18,9 фоиз);
• қишлоқ хўжалиги ва томорқадан даромадлар – 10,7 фоиз (9,8 фоиз);
• хориждан пул ўтказмалар – 2,0 фоиз (3,1 фоиз);
• бошқа даромадлар – 3,6 фоиз (4,9 фоиз)ни ташкил этган.

Аҳолининг иш ҳақидан даромадлари эса 2023 йилга нисбатан 12,9 фоизга кўпайган.

Эслатиб ўтамиз, 2022 йилда Ўзбекистонда киши бошига минимал истеъмол харажатлар бир ойда 498 минг сўмни ташкил этиши ҳисоб-китоб қилинган эди. Мазкур кўрсаткичдан мамлакатда камбағаллик чегарасини белгилашда фойдаланилади.