Ўзбекистонда юк автомобиллари паркини янгилаш ва модернизация қилиш мақсадида замонавий юк транспорт воситалари импортига божхона имтиёзлари жорий этилади.

Бу президентнинг 2026 йил 7 июлдаги «Автомобиль транспортида юк ташувларини амалга оширувчи тадбиркорлик субъектлари фаолиятини қўллаб-қувватлашга қаратилган қўшимча чора-тадбирлар тўғрисида»ги қарорида белгиланди.

Қарорга кўра, 2027 йил 31 декабргача ишлаб чиқарилганига 5 йилдан ошмаган, юк ташиш учун мўлжалланган (самосваллардан ташқари) айрим транспорт воситаларини Ўзбекистонга олиб киришда божхона божи ва утилизация йиғими бўйича нол ставка қўлланилади.

Имтиёз «Евро-5» ва ундан юқори экологик стандартларга жавоб берадиган юк автотранспорт воситалари, шунингдек, тўла вазни 15 тоннадан ортиқ ёки юкхонасининг ички ҳажми камида 76 куб метр бўлган ярим тиркамаларга татбиқ этилади.

Шу билан бирга, мазкур имтиёз асосида олиб кирилган транспорт воситалари божхона расмийлаштирувидан ўтказилган кундан бошлаб уч йил ичида экспорт қилинса ёки қайта жиҳозланиши натижасида TIF TN коди ўзгарса, берилган божхона имтиёзлари бекор қилинади. Бунда ёқилғи турини ўзгартириш билан боғлиқ қайта жиҳозлаш ҳолатлари бундан мустасно.

Бундан ташқари, қарор билан Европа стандартларига мос келадиган мазкур юк автотранспорт воситаларини импорт қилишда уларни мажбурий сертификатлашдан вақтинчалик озод этиш бўйича тегишли қарор қабул қилиниши ҳам белгиланди.