2024 йилда истеъмолчиларга 1 трлн сўмдан ортиқ кешбэк тўлаб берилди. Бу ҳақда Давлат солиқ қўмитаси хабар берди.

Унга кўра, ўтган йилда истеъмолчиларга 1 млрд чек учун 1 трлн сўмдан ортиқ кешбэк тўланган. Шундан 89,2 млрд сўми декабрь ойи учун берилган.

Тўланган кешбэкларнинг энг катта қисми қуйидаги ҳудудларга тўғри келмоқда:

• Тошкент шаҳри — 412,2 млрд сўм;
• Тошкент вилояти — 107,1 млрд сўм;
• Самарқанд вилояти — 93,2 млрд сўм;
• Фарғона вилояти — 75,6 млрд сўм;
• Андижон вилояти — 52 млрд сўм.

Қандай чекларга кешбек қайтарилмайди

Қуйидаги ҳолларда кешбек ҳисобланмайди:

• агар чек берилганига 10 кундан ортиқ вақт ўтган бўлса;
• сотиб олинган товар (хизмат)лар чеки учун аввал кешбек ҳисобланган бўлса.

Автомобиль, ҳаво ва темир йўл чипталари, шунингдек, алоқа ва коммунал хизматлар учун амалга оширилган тўлов чеклари учун ҳам кешбек қайтарилмайди.

Шу билан бирга шубҳали харидорлар реэстрига киритилган жисмоний шахслар чекларни рўйхатдан ўтказганда ҳам кешбек тақдим этилмайди.

Аввалроқ кешбэк тасдиқланмаганини қандай аниқлаш мумкинлиги тўғрисида маълумот берилган эди.