Самолётга қанча қўл юкини олиб чиқиши мумкин? Uzbekistan Airways бу бўйича батафсил маълумот берди
Авиакомпания ҳаво кемалари экипаж аъзолари учун ҳам қўл юки миқдори белгиланган. Йўловчи ўз ихтиёрига кўра қўл юки сифатида чамадон, рюкзак ёки сумка ўрнига ғилофга солинган битта мусиқа асбобини олиши мумкин.
Ҳаво кемаси салонида алоҳида ўриндиқни эгаллаган ҳар бир йўловчи авиақатнов давомида багаж жавонларида йўловчи ўриндиқларининг тепасида ёки олдинда турган йўловчи ўриндиғи тагида жойлаштириладиган қўл юки жойини ўзи билан олиб ўтиши мумкин, бунда қўл юкининг миқдори ва оғирлиги қуйидагилардан ошмаслиги керак:
- иқтисодий класс йўловчилари учун – оғирлиги 8 кг дан ошмайдиган 1 та қўл юки;
бизнес-класс йўловчилари учун авиақатнов йўналишига қараб белгиланади:
- оғирлиги 10 кг дан ошмайдиган битта қўл юки ёки;
- ҳар бирининг оғирлиги 8 кг дан ошмайдиган иккита қўл юки;
- авиаташув нархининг камида 50 фоизи тўланган болалар учун – хизмат кўрсатиш классига мувофиқ катта ёшдаги йўловчилар учун белгиланган меъёр асосида;
- 2 ёшгача бўлган болалар учун қўл юкини бепул олиб ўтиш меъёри назарда тутилмаган;
- хизмат талабномасига асосан расмийлаштирилган авиачипталарга эга йўловчилар учун – авиачиптада кўрсатилган хизмат кўрсатиш класси учун белгиланган меъёрга мувофиқ;
- Uzbekistan Airways АЖ ҳаво кемалари экипаж аъзолари учун – оғирлиги 8 кг дан ошмайдиган 1 та қўл юки.
Йўловчи ўз ихтиёрига кўра қўл юки сифатида чамадон, рюкзак ёки сумка ўрнига ғилофга солинган битта мусиқа асбобини олиши мумкин. Бундай мусиқа асбобининг оғирлиги тегишли хизмат кўрсатиш тоифаси учун белгиланган қўл юки оғирлигидан ошмаслиги, ўлчамлари эса уч ўлчам йиғиндиси бўйича 150 сантиметрдан кўп бўлмаслиги лозим.
Қўл юки жойи томонларининг рухсат этилган энг катта ўлчамлари 55 см, 35 см ва 25 см дан, уч ўлчам йиғиндиси эса 115 см дан ошмаслиги лозим. Бу ўлчамларга қўл юки сифатида олиб ўтиладиган юк жойларининг ғилдираклари, дасталар ва ён чўнтаклари ҳам киради.
Ташувчи белгилаган оғирлик ва (ёки) ҳажм меъёридан ортиқ бўлган қўл юки рўйхатга олинган багаж сифатида топширилиши шарт.
Қўл юкини олиб ўтиш учун рухсат этилган меъёрдан ташқари, йўловчи ҳаво кемаси салонига парвоз вақтида ўзига зарур бўлган қуйидаги нарсаларни олиши мумкин:
- оғирлиги 5 кг гача бўлган ва уч ўлчам йиғиндиси бўйича ўлчамлари 92 см дан ошмайдиган аёллар сумкаси, эркаклар барсеткаси, ихчам портфель ёки рюкзак;
- уч ўлчам йиғиндиси бўйича ўлчамлари 118 см дан ошмайдиган (55×40×23 см) болалар йўл бешиги ёки йиғма болалар аравачаси;
- соябон ёки ҳасса;
- портпледли костюм;
- Duty Free дўконларидан сотиб олинган, оғирлиги 5 кг дан ортиқ бўлмаган, уч ўлам йиғиндиси бўйича ўлчами 92 см дан катта бўлмаган пакетга жойланган буюмлар;
- ҳаракатланиш имконияти чекланган йўловчиларнинг мустақил ҳаракатланиши учун зарур бўлган турли хил мосламалар (қўлтиқтаёқлар, юргизгичлар, ҳассалар, ролаторлар ва бошқалар), йўловчи томонидан парвоз пайтида фойдаланиладиган ва ҳаво кемаси салонига хавфсиз жойлаштирилиши мумкин бўлган мосламалар. Йиғиладиган ногиронлар аравачаси ҳаво кемаси салонида фақат уни хавфсиз жойлаштириш учун жой мавжуд бўлган тақдирдагина олиб ўтилади. Бундай жой бўлмаган тақдирда, ногиронлар аравачаси қўшимча тўлов ундирилмасдан рўйхатдан ўтказилган багажда олиб ўтиш учун топширилади.
Литий батареялари/аккумуляторлари/қувват блоклари бўлган мобил телефонлар, планшетлар, электрон сигареталар ва бошқа гаджетларни фақат қўл юкида олиб ўтиш мумкин. Бу буюмларни рўйхатга олинадиган багажда олиб ўтиш учун топшириш мумкин эмас.
