Commonwealth Partnership Uzbekistan (CMWP) консалтинг компанияси Тошкентнинг савдо (ритейл) кўчмас мулк бозори бўйича 2024 йилги шарҳини тақдим этди.

Қайд этилишича, ўтган йилда Тошкентнинг савдо кўчмас мулк бозори сезиларли даражада кенгайган. Форматли савдо марказларининг умумий майдони 478,5 минг метр квадратга етиб, 2023 йилга (276,5 минг метр квадрат) нисбатан 73 фоизга ошган.

2024 йилда Tashkent City Mall’нинг очилиши энг катта янгилик бўлди — у ижарага бериладиган 100 минг метр квадрат майдонни тақдим этди.

Йирик савдо марказларида ижара нархлари деярли ўзгармаган. Ўртача ҳисобда 1 қаватдаги 100 метр квадрат майдон учун ойига 40 доллар тўланади, лекин жойлашувга қараб бу ставкалар 15−70 доллар оралиғида бўлиши мумкин.

Шарҳда айнан 1 қаватдаги 100 метр квадрат майдон учун ижара баҳоси ҳисобга олинган, чунки бундай дўконлар энг талабгир бўлиб, савдо марказларининг асосий қисмини ташкил қилади.

Нархлар орасидаги тафовут қуйидагиларга боғлиқ:

• савдо марказининг сифати;
• шаҳардаги жойлашуви;
• бинонинг ички ҳудудидаги жойлашув (одам гавжум жойларда ижаралар қимматроқ бўлади).

Бўш савдо майдонлари улуши ҳали ҳам юқори, аммо янги савдо марказлари аста-секин тўлиб бораётгани сабабли бу улуш камаймоқда. CMWP экспертлари яқин бир йилда ижара ставкаларининг ошишини кутмаяпти, чунки бозорга таклиф ортиб бормоқда.

Хорижий брендларнинг кириб келиши

Халқаро брендлар Ўзбекистонга фаол кириб келмоқда ва савдо марказларида катта жойларни эгалламоқда. Uzbekistan Franchising Association маълумотларига кўра, мамлакатда 460 та франчайзинг бренди ва 13 400 та франчайзинг савдо нуқтаси фаолият юритмоқда. Бу эса ижарачилар орасида рақобатни кучайтириб, сифатли савдо майдонларига бўлган талабни оширяпти.

Экспертларга кўра, Тошкентнинг ритейл бозори ўзгаришда давом этмоқда. Савдо марказлари ўз объектларини замонавийлаштириш ва қулайроқ қилиш устида ишлаяпти.

2010−2016 йилларда қурилган савдо марказлари ҳозирда модернизация қилинмоқда, чунки ижарачилар ва мижозлар талабларига мослашиш керак.

Шунингдек, иқтисодий форматдаги дўконларга талаб ошмоқда: экобозорлар ва фешмарказлар, бу ерда харидорлар фермерлар ва ишлаб чиқарувчилардан тўғридан-тўғри янги маҳсулот харид қилишлари мумкин.

Бозорнинг келажаги қандай?

2025 йилда Тошкентда янги савдо марказлари очилиши кутилмоқда. Энг йирик лойиҳалардан бири – Alfraganus бўлиб, у 77 минг метр квадрат ижарага бериладиган майдон тақдим этади.

Шунингдек, яна 89,2 минг метр квадрат савдо майдони бўлган учта йирик савдо марказлари ишга туширилиши кутилмоқда:

• Piramit – 28,5 минг метр квадрат;
• Park In Mall – 24,7 минг метр квадрат;
• High Town Mall – 36 минг метр квадрат.

CMWP экспертларининг прогнозига кўра, Тошкентдаги умумий савдо марказлари ҳажми 567,7 минг метр квадратга етиши мумкин, аммо айрим лойиҳалар 2026 йилга кўчирилиш хавфи мавжуд.

Шунингдек, анъанавий бозорларга эътибор ошмоқда. «Акция» бозори ва «Юнусобод бозори» реконструкция қилиниши, шунингдек, гастрономик ва савдо кластерлари ривожлантирилиши режалаштирилган.

Сифатли савдо майдонларига талаб сақланиб қолади, лекин ижара ставкалари юқори рақобат сабабли барқарор бўлиб қолиши кутилмоқда, — дейилади шарҳда.

Умуман олганда, Тошкентнинг ритейл бозори фаол ўсишда давом этмоқда, лекин янги объектларнинг кўплиги ва секин тўлиш жараёни 2025 йилда ижара нархларининг сезиларли даражада ошишига тўсқинлик қилиши мумкин.