Марказий банк 5 та банкни жаримага тортди
Шу билан бирга, февраль ойида регулятор 3 та банкка чора ва санкциялар бўйича огоҳлантириш берди.
Жорий йилнинг февраль ойида Марказий банк 5 та банкка нисбатан жарима қўллади. Бу ҳақда регулятор матбуот хизмати хабар берди.
Марказий банкнинг Банк назорати қўмитаси томонидан ўтган ойдаги йиғилишларида 43 та масала кўриб чиқилиб, тегишли қарорлар қабул қилинди. Хусусан, рўйхатга олиш ва рухсат бериш йўналишида 31 та масала муҳокама қилинди.
Шундан 8 таси кредит ташкилотлари уставига киритилган ўзгартиришларни рўйхатдан ўтказиш, 3 таси янги очилаётган микромолия ташкилотларини ҳисоб рўйхатдан ўтказиш, 5 таси кредит ташкилотларининг устав фондидаги улушига эгалик қилиш учун рухсат бериш ва 1 таси ваколатхона очишга рухсат бериш бўйича бўлган.
Регулятор томонидан ўтказилган ўрганишларда аниқланган камчиликлар, жумладан, ўрнатилган иқтисодий меъёрларга ва қонунчилик талабларига риоя қилинмаганлиги учун 3 та банк чора ва санкциялар қўлланилиши тўғрисида огоҳлантирилди.
Марказий банк томонидан ўтказилган ўрганиш ва инспекция текширувлари давомида аниқланган қоидабузарликлар учун 5 та банкка нисбатан жарима санкцияси қўлланилди.
Кредит ташкилотларининг молиявий ҳолатига оид 12 та масала — Марказий банкнинг кўрсатмалари ва пруденциал меъёрлари талабларининг бажарилиши, банкларда ўтказилган ўрганиш натижалари муҳокама қилинди.
Шу билан бирга, Ишонч плюс ҳамкор микромолия ташкилоти давлат реестридан чиқарилди. Бу бўйича микромолия ташкилоти таъсисчилари томонидан ташкилотни тугатиш тўғрисида қарор қабул қилинган.
