Ўзбекистондаги хориж компаниялари олти ойда 78,2 млрд сўм солиқ тўлади
Хусусан, январь—июнь ойлари давомида Мета компанияси 22,6 млрд сўм, TikTok эса 1,8 млрд сўм солиқ тўлади.
Ўзбекистонда электрон хизматлар кўрсатувчи хорижий компаниялар 78 миллиард сўмдан ортиқ солиқ тўлаган. Солиқ қўмитаси матбуот хизмати маълумотларига кўра, мамлакатда электрон хизматлар кўрсатувчи 72 та хорижий компания томонидан 2025 йилни I ярим йиллигида 78,2 миллиард сўм солиқ тўланган. Бу 2024 йилнинг мос даврига нисбатан 42 фоизга кўп.
2024 йил январь—июнь ойларида Ўзбекистонда электрон хизматлар кўрсатувчи 60 та хорижий компания томонидан 48,4 миллиард сўм солиқ тўланганди.
Тўланган солиқларнинг 94 фоизи электрон хизматлар кўрсатувчи қуйидаги 10 та хорижий компаниялар ҳиссасига тўғри келади:
- Meta — 22,6 млрд сўм;
- Apple — 22,1 млрд сўм;
- Google — 19,4 млрд сўм;
- OpenAI — 2,9 млрд сўм;
- Booking.com — 1,9 млрд сўм;
- TikTok — 1,8 млрд сўм;
- Netflix — 896,2 млн сўм;
- Аccа — 797,1 млн сўм;
- Zoom — 786,7 млн сўм;
- Adobe — 530,8 млн сўм.
Электрон хизматлар кўрсатувчи чет эл юридик шахслари ўтган чоракдан кейинги ойнинг 20-кунидан кечиктирмай солиқ ҳисоботларини тақдим этади ва солиқларни тўлайди. Жорий йилнинг январь—июнь ойлари давомида 5 та компания ҳисобдан чиқарилиб, 14 та компания ҳисобга қўйилган. 2025 йил январида 63 та компания бўлган, 2025 йил июлига келиб уларнинг сони 72 тага етган.
