2025 йил август ойи ҳолатига кўра, мавжуд 35 та банкдан 28 тасида микроқарзлар берилмоқда. Улар минимал уч ойдан максимал беш йилгача муддатга, 1 млн сўмдан 100 млн сўмгача берилиши мумкин.

Марказий банк маълумотларига кўра, август ойига келиб, ўртача фоиз ставкаси 34,9% дан 36,3% гача кўтарилган. Саккизта банк муассасаси 40% ва ундан юқори ставкада кредит таклиф этмоқда. Булар қаторига Анорбанк, Апех Банк, Ҳамкорбанк, Invest Finance Bank, Ипак Йўли Банк, Ипотекабанк, TBC Bank ва Янги банк киради.

Кредитни ҳам онлайн, ҳам офлайн олиш мумкин. Мобил илова орқали расмийлаштиришда маблағлар ариза берувчининг виртуал ҳисобварағига ёки банк картасига ўтказилади.

Кредит учун гаров сифатида қуйидагилар қабул қилинади:

• учинчи томон кафолати;
• суғурта полиси;
• ликвид гаров — транспорт воситалари, кўчмас мулк, заргарлик буюмлари.

Қарз олувчига қўйиладиган асосий талаблар — ижобий кредит тарихи ва ҳозирги иш жойида камида олти ой иш тажрибаси.

Марказий банк 2024 йил 1 ноябрдан кредит ташкилотлари томонидан жисмоний шахсларга онлайн кредит ажратиш жараёнида банк карталари билан боғлиқ шубҳали фрод операцияларининг олдини олишга қаратилган вақтинчалик тартибни жорий этди.

Унга кўра, илова орқали ариза беришда биометрик идентификациядан ўтиш керак. Бу аризачининг шахсан ўзи томонидан берилганлигини аниқлаш имконини беради.

Агар қарздорнинг қарзлари кўп ёки муддати ўтган бўлса, банк кредитни рад этиши ёки унинг миқдорини камайтириши мумкин.

Рўйхат алифбо тартибида тузилган ва банкларни тартибламайди. Маълумотлар банк веб-сайтларидан олинган.