Марказий банк 2026 йил И чорак якуни бўйича Микромолия хизматлари бозори шарҳини эълон қилди. Кредит ташкилотлари томонидан жорий йилнинг январь март ойларида жами 35,8 трлн сўм миқдорида микромолия хизматлари кўрсатилиб, 2025 йилнинг мос даврига нисбатан 5,2 трлн сўмга ёки 17 фоизга ошган.

Натижада, кўрсатилган микромолия хизматларининг жами ажратилган кредитлардаги улуши 2025 йилнинг мос даврига нисбатан 0,6 фоиз бандга ортиб, 35,1 фоизни ташкил этган.

Иштирокчилар кесимида банклар етакчи ҳисобланиб, уларнинг улуши 66 фоизни ташкил қилди. Қолган улуш микромолия ташкилотлари (31,2%) ва ломбардлар (2,8%) ҳиссасига тўғри келади.

Юқори ўсиш кўрсаткичи давлат улуши мавжуд банклар кесимида Агробанк, Ўзмиллийбанк ва Халқ банкида, хусусий банклар кесимида Ипотека банк, Ҳамкорбанк ва Анорбанкда қайд этилди.

Микромолия ташкилотлари томонидан кўрсатилган жами 11,2 трлн сўмлик микромолия хизматларининг 71 фоизи ёки 7,9 трлн сўми учта микромолия ташкилотлари, яъни TezCoin, Shaffof-moliya ва Fortuna biznes ҳиссасига тўғри келади.

Ломбардлар томонидан 1 трлн сўмлик микроқарзлар кўрсатилган бўлиб, ташкилотлар кесимида энг юқори кўрсаткич 140 млрд сўмни ташкил этган.

Ушбу давр мобайнида 26,6 трлн сўмлик микроқарзлар ва 9,2 трлн сўмлик микрокредитлар ажратилган. Бунда, микроқарзлар улуши 74 фоизни, микрокредитлар улуши эса 26 фоизни ташкил этди.

Ҳудудлар кесимида кўрсатилган микромолия хизматларининг 20,6 трлн сўми ёки 58 фоизи Тошкент шаҳри ҳиссасига тўғри келади. Энг юқори ўсиш кўрсаткичи Андижон, Самарқанд ва Тошкент вилоятларида кузатилган.