Ўзбекистон ялпи ички маҳсулоти (ЯИМ) ҳажми 2025 йил якунига келиб, 130 млрд доллардан ортиши кутилмоқда. Бу ҳақда Шавкат Мирзиёев Ўзбекистон мустақиллигининг 34 йиллиги муносабати билан тақдирланганларга мукофотларни топшириш маросимида маълум қилди.

«Ўтган саккиз йилда ялпи ички маҳсулотимиз шиддат билан ўсиб, 115 млрд долларга етди. Бугун битта рақамни биринчи марта айтмоқчиман: Халқаро валюта жамғармаси прогнозига кўра, бу йил иқтисодиётимиз ҳажми 130 млрд доллардан ошиши кутилмоқда», — деди Шавкат Мирзиёев.

Давлат раҳбари бу натижада тадбиркорликнинг кенг қўллаб-қувватланиши, замонавий саноат мажмуалари барпо этилгани, «яшил» ва инновацион иқтисодиётга ўтилиб, муқобил энергия манбалари яратилаётгани, ахборот технологиялари, туризм ва молиявий технологиялар каби хизмат кўрсатиш тармоқлари ривожлантирилаётгани муҳим роль ўйнаганини таъкидлади.

Қайд этилишича, мамлакатда саноат ишлаб чиқариш ҳажми 62 млрд долларга етди (2016 йилда 28 млрд доллар бўлгани қўшимча қилинди). Хусусий қурилиш компаниялари сони 30 мингдан ошди, қурилиш материаллари ишлаб чиқариш ҳажми 6 млрд долларга яқинлашди. 2024 йил якунларига кўра, жами 23 млрд долларлик қурилиш ишлари амалга оширилди (2016 йилга нисбатан 4 карра кўп).

Мамлакат иқтисодиётига 155 млрд доллар инвестиция жалб қилиниб, 100 мингдан ортиқ лойиҳа ишга тушди. Натижада 7 миллиондан зиёд аҳоли даромадли бўлди, дейилади хабарда.

Таъкидланишича, ўтган саккиз йил давомида маҳалла инфратузилмасини яхшилаш, қишлоқларни, йўлларни обод қилиш учун 60 трлн сўм маблағ сарфланди. Ижтимоий инфратузилмага олдинги йилларга нисбатан олти карра кўп маблағ йўналтирилди. Натижада боғча ўринлари 720 мингдан 2,5 миллионга етказилди. 466 та янги мактаб қурилиб, 1 миллионга яқин ўқувчи ўрни яратилди. Олий таълимда қамров 40 фоизга кўтарилди.

«Авваллари 500 миллион долларга етмаган туризм экспорти ҳозир 3 млрд долларлик маррадан ошди. Етти-саккиз йил олдин ИТ экспорти 1 миллиард долларга етади деса, бунга ким ишонарди? Энг муҳими, барча тармоқларга янги илм, замонавий технологиялар кириб келди. Уларда юз минглаб иш ўринлари ва юқори малакали кадрлар армияси пайдо бўлди», — дея таъкидлади Шавкат Мирзиёев.