Марказий банк бошқаруви 11 декабрдаги йиғилишида асосий ставкани йиллик 14% даражасида сақлаб қолиш тўғрисида қарор қабул қилди. Бу ҳақда регулятор матбуот хизмати хабар берди.

Таъкидланишича, нисбатан қатъий пул-кредит шароитлари инфляцион босим ва кутилмаларни пасайтиришга ёрдам бермоқда. Барқарор истеъмол талаби, таклиф омиллари ва хизматлар нархларининг юқори ўсиши туфайли инфляцион хатарлар сақланиб қолмоқда.

Ноябрь ойида инфляциянинг пасайиши давом этиб, йиллик 7,5% га тенг бўлди. Бунга, қатъий пул-кредит шароитлари ва сўмнинг мустаҳкамланиши таъсирида базавий инфляциянинг секинлашиши асосий ҳисса қўшди. Хусусан, ноябрда базавий инфляция йиллик ҳисобда 6,3% гача пасайди. Импорт нархлари ноозиқ-овқат товарлари инфляциясининг барқарорлашувига хизмат қилди.

Шу билан бирга, хизматлар соҳасидаги инфляция маълум даражада секинлашганига қарамай, талаб ҳисобига умумий инфляция даражасидан юқорилигича қолмоқда. Ноябрь ойида аҳоли ва тадбиркорларнинг инфляцион кутилмалари пасайишда давом этди.

Шундан келиб чиқиб, 2025 йил якунига умумий инфляция 7,3% атрофида бўлиши кутилмоқда. Бунда сўм мустаҳкамланиши аввалги баҳоларга нисбатан юқорироқ даражада шаклланди.

Импорт инфляцияси ва инфляцион кутилмаларнинг кутилганидан тезроқ пасайиши сабабли инфляция прогнози яна бир бор пастга туширилди. Янгиланган прогнозларга кўра, 2026 йил якунида инфляция даражаси 6,5% атрофида бўлиши кутилмоқда.

Иқтисодий фаоллик юқори даражада сақланиб, ўсиш суръатлари потенциалдан юқори шаклланмоқда. Меҳнат бозоридаги талаб, савдо ва хизматлар тушумлари ҳамда банклараро транзакциялар ҳажмининг ошиши бунга асос бўлмоқда.

Жорий иқтисодий ва инвестицион фаоллик фонида йил якунида иқтисодий ўсиш 7−7,5% атрофида шаклланиши кутилмоқда.

Инфляция пасайиб бораётганига қарамай, таклиф омиллари бўйича хатарлар сақланиб қолмоқда — айрим асосий озиқ-овқат товарлари таклифи, транспорт нархлари ошиши ва тартибга солинадиган нархлар индексациясининг иккиламчи таъсири шулар жумласидан.

Глобал иқтисодиёт кутилганидан тез ўсмоқда, халқаро хомашё бозорларидаги юқори нарх конъюнктураси сақланиб қолмоқда. Бу эса келгусида ҳам мамлакат экспорт тушумларини қўллаб-қувватлайди. Бу фонда реал самарали алмашув курси ўзининг узоқ муддатли мувозанатли трендига яқин даражада шаклланади.

Ички молия бозорида номинал ставкалар барқарор бўлиб, инфляция пасайиши реал фоиз ставкаларини оширмоқда. Бу эса миллий валютада жамғариш рағбатини кучайтириб, муддатли депозитлар ўсишига хизмат қилмоқда.

Молиявий инклюзивлик ошгани сабаб чакана кредитлаш юқори даражада сақланмоқда, бу эса истеъмол фаоллигининг юқорилигини кўрсатади ҳамда ялпи талабни қўллаб-қувватлаб, келгусида инфляцияга оширувчи босимнинг кучайишига олиб келиши мумкин.

Ушбу шароитда инфляциянинг пасаювчи динамикасини барқарор давом эттириш ва инфляцион хатарлар таъсирини камайтириш мақсадида асосий ставкани жорий йиллик 14% даражасида ўзгаришсиз сақлаб қолиш зарур деб топилди.

Марказий банк инфляциянинг 5%лик таргетигача пасайишига эришиш мақсадида пул-кредит шароитларини етарлича қатъийлигини таъминлаб боради. Бунда инфляция динамикаси ва инфляцион хатарлар балансига қараб пул-кредит шароитлари қайта кўриб чиқилиши мумкин.