Ўзбекистонда уй-жой харид қилишда кешбек жорий этиш масаласи кўриб чиқилмоқда. Бу ҳақда 29 август куни Савдо-саноат палатаси томонидан қурилиш соҳаси вакиллари билан ташкил этилган очиқ мулоқотда маълум қилинди.

Савдо-саноат палатаси раиси Даврон Ваҳобовнинг таъкидлашича, уй-жой қўшилган қиймат солиғини (ҚҚС) ҳисобга олган ҳолда сотиб олиниши керак. Унинг айтишича, уй-жойларнинг бор-йўғи тахминан 10 фоизи ҚҚС билан, қолган 90 фоизи эса солиқсиз сотиб олинади.

«Жисмоний шахслар учун 4−5 фоиз кешбэк жорий қилиш ҳақида фикрлар бор, шунда улар қурилиш компаниясига мурожаат қилиб, битим суммасининг 5−6 фоиз миқдорида кешбек олиш учун ҳисобварақ-фактура талаб қилади. Балки бу қурилиш соҳасидаги «яширин иқтисодиёт» ҳолатини ўзгартиришга ёрдам берар?» — деди у.

Аввалроқ ушбу очиқ мулоқот чоғида 2023−2024 йилларда қурилиш соҳаси ривожланишига оид асосий кўрсаткичлар, шу жумладан, соҳада яширин иқтисодий фаолият билан боғлиқ масалалар муҳокама қилингани хабар берилган эди.

Тақдим этилган маълумотларга кўра, қурилиш соҳасида кузатилмайдиган иқтисодиётнинг ҳажми 97 трлн сўмга (41 фоиз) баҳоланмоқда. Яширилган солиқлар 1,2 трлн сўмни, талон-торож қилинган маблағлар эса 203 млрд сўмни ташкил этади.

Норасмий бандлик ва иш ҳақини «конвертда тўлаш» орқали солиқдан қочишга уриниш сабабли 6,3 мингта объект ҳисоботларида 0 ёки 1 нафар ишчи билан қуриб битказилганлиги кўрсатилган.