Тошкент шаҳрида қишлоқ хўжалиги маҳсулотлари етиштирувчи тадбиркорлар билан учрашув бўлиб ўтди. Унда Солиқ қўмитаси раиси Шерзод Кудбиев, Савдо-саноат палатаси раиси Даврон Ваҳобов ҳамда бошқа тегишли вазирлик ва идоралар раҳбарлари иштирок этмоқда.

Мазкур учрашув президентнинг «Қишлоқ хўжалиги соҳасида қўшилган қиймат солиғини ҳисоблашнинг соддалаштирилган тартибини жорий этиш чора-тадбирлари тўғрисида»ги янги фармони мазмун-моҳиятини атрофлича тушунтириш мақсадида ташкил этилди.

Учрашувда таъкидланишича, 2024 йилда 1 060 та қишлоқ хўжалиги корхоналарига 780 млрд сўм, жорий йилнинг И ярим йиллигида эса 644 та корхонага 145,2 млрд сўм ҚҚС қопланган.

Бундан ташқари 2025 йил 1 апрелдан чорвачилик ва паррандачилик хўжаликларига тўланган ҚҚСнинг 50 фоизи қайтариб берилмоқда.

2025 йил 1-центабр ҳолатига 63 та тадбиркорга 2,3 млрд сўм ҚҚС қайтариб берилган.

Бугунги кунда норасмий иқтисодиётда қишлоқ хўжалигининг улуши 44,2 фоизни ташкил этиб, бошқа соҳаларга нисбатан юқорилигича сақланиб қолмоқда.

Солиқ қўмитаси раисига кўра, электрон ҳисобварақ-фактуралар хавф даражасига қараб автомат тарзда таҳлил қилинади

«Ўзбекистонда жами 1 ойда 3,5 млндан ортиқ фактуралар яратилади. Шундан 350 мингтасини биз хавф даражасига қараб баҳолаб чиқамиз. Дастлабки босқичда 10 фоизини баҳолаймиз.

Энг хавфли фактураларни қизил қилиб кўрсатиб қўямиз — агар солиқ тўловчи уни қабул қилса, унга ҚҚС ҳисоб (зачёт)га олинмайди. Агар ушбу ЭҲФ бўйича ҚҚС суммаси бюджетга тўлиқ тўланган бўлса, фактура автомат равишда яшил ҳолатга ўтади», — дейди Шерзод Кудбиев.