Ўзбекистонда ишлаб чиқариш корхоналари тўлаган солиқлар миқдори икки баравар ошди
Жорий йил январь–июль ойларида 58 564 та ишлаб чиқарувчи корхона 52 трлн сўмдан ортиқ солиқ тўлади. Таққослаш учун, 2024 йил мос даврида мазкур йўналишдаги 65 134 та юридик шахсдан 23,8 трлн сўм солиқ ундирилган.
Солиқ қўмитаси хабарига кўра, 2025 йилги солиқларнинг 10,9 трлн сўмини 20 та корхона тўлаган. Уларнинг товар айланмаси 108,2 трлн сўм, фойдаланган солиқ имтиёзлари 2 трлн сўмдан ошган. Корхоналарнинг ярмидан кўп давлатга қарашли ҳисобланади. Мазкур рўйхатга мамлакатдаги энг йирик қимматбаҳо металлар қазиб олувчилар — Навоий ва Олмалиқ кон-металлургия комбинатлари киритилмаган.
ТОП 20 таликка кирган корхоналардан энг кўп тушумлар қўшилган қиймат солиғидан келган — 3,6 трлн сўм. Шу билан бирга, акциз (2,6 трлн сўм), фойда (1,4 трлн сўм) ва ер қаъридан фойдаланганлик учун (1,3 трлн сўм) солиқлар тушумлари улуши юқори бўлган.
Ишлаб чиқарувчи корхоналар орасида «Ўзбекнефтгаз» АЖ энг кўп солиқ тўлаган — 2,15 трлн сўм. Бу миқдор компаниянинг ўтган йил мос давридаги тўловидан кам (2,3 трлн сўм).
Кейинги ўринларда «Узбат» АЖ (1,56 трлн сўм), «Талимаржон ИЭС» АЖ (1,3 трлн сўм), UzAuto Motors АЖ (983,9 млрд сўм) қайд этилган. Ўз навбатида «Шўртан газ-кимё мажмуаси» МЧЖ (571,4 млрд сўм) бешинчи ўринни эгаллаган. Рўйхатдаги қолган 15 та корхонадан ундирилган солиқлар миқдори 562,1 млрд сўмдан 142,6 млрд сўмгача пасайиб борган.
2025 йил 1 август ҳолатига кўпа, Ўзбекистонда солиқ қарзи 100 миллион сўмдан юқори ишлаб чиқариш корхоналари сони 998 тани ташкил этган. Уларнинг жами қарздорлиги 1,1 триллион сўм бўлган.
Аввалроқ мамлакатда 4 млн нафардан ортиқ одам давлатга солиқ тўламасдан, норасмий ишлаётгани маълум қилинган.
