Ўзбекистон Республикаси Марказий банки томонидан 3 та банкка жарима санкцияси қўлланилди. Бу ҳақда Марказий банк матбуот хизмати хабар берди.

Маълум бўлишича, 2025 йилда TBC Bank, Даврбанк ва Ҳамкорбанкда ўрганиш ўтказилиб, қатор қонунбузарликлар аниқланган:

• TBC bank’да: истеъмолчига ахборот етарли берилмаслиги, гаров реестридан мулкларни кечиктириб чиқариш, онлайн микроқарзларни огоҳлантиришсиз ажратиш, мурожаатларни кўриб чиқишда талаблар бузилиши;
• Давр банкда: хизматларни қўшимча шартлар билан кўрсатиш, кредитлар бўйича нотўғри ҳисоб-китоб, ахборотнинг етарли бермаслиги, шартномаларда истеъмолчи ҳуқуқларини чеклаш, кредит қийматини кўрсатмаслик, гаров реестридан мулкларни кечиктириб чиқариш, мурожаатларни кўриб чиқишда қонунга риоя этмаслик.

Ҳамкорбанкда: истеъмолчига керакли ахборот берилмаслиги, кредитлар бўйича ноқонуний комиссиялар ундириш, гаров реестридан мулкларни кечиктириб чиқариш, мурожаатларни кўриб чиқишда қонуний талаблар бузилиши.

Шу асосда:

TBC Bank’ка 615 млн сўм, Даврбанкка 931 млн сўм, Ҳамкорбанкка 955 млн сўм жарима қўлланилди.

Шунингдек, аниқланган ҳолатларни бартараф этиш, истеъмолчиларга етказилган зарарни қоплаш ва уларнинг бузилган ҳуқуқларини тиклаш юзасидан банкларга аниқ кўрсатмалар берилди. Жумладан, TBC Bank томонидан кредитни қайтариш жадвалида кўрсатилган тўловлардан кўп келиб тушган маблағлар белгиланган тартибда қарздорликни сўндиришга йўналтирилмагани натижасида қарз олувчиларга ортиқча ҳисобланган 2,5 млрд сўм фоизлар ҳамда кредитлар бўйича қарздорликни ундириш тўғрисида суд қарорлари чиқарилгандан сўнг қонунга зид равишда ҳисобланган 1,7 млрд сўм фоизлар истеъмолчилар фойдасига қайта ҳисоб-китоб қилинди.

Даврбанк томонидан хорижий валютада ажратилган кредитлар бўйича ортиқча ҳисобланган 1,7 млрд сўм фоизлар, қонунчиликка зид равишда кредит суммасидан ушлаб қолинган 1,9 млрд сўм маблағлар ва гаров мулкини тақиққа қўйиш учун ундирилган 461,6 млн сўм тўловлар истеъмолчиларга қайтариб берилди.

Ҳамкорбанкка эса қонунчиликка зид равишда кредит ажратишда ундирилган 19,2 млрд сўм тўловлар ҳамда гаров мулкини тақиққа қўйиш ва тақиқдан чиқариш учун ундирилган 1,5 млрд сўм тўловлар, шунингдек, кредит шартномаларига назарда тутилмаган бўлсада, лекин қарз олувчилардан ундирилган 54,9 млн сўм комиссияларни истеъмолчиларга қайтариб беришни таъминлаш юзасидан вазифалар юклатилди.

Бундан ташқари, Марказий банкка молиявий хизматлар истеъмолчиларидан келиб тушаётган мурожаатларда кўтарилаётган асосли масалалар истеъмолчилар фойдасига ҳал қилинмоқда.

Хусусан, Марказий банкка банк тизими бўйича келиб тушган мурожаатларнинг 121 тасида келтирилган шикоятлар, шу жумладан 68 таси бўйича 2,4 млрд сўмлик молиявий нафлар мурожаат қилувчининг фойдасига ҳал этилган.