Ўзбекистонликларнинг инфляцион кутилмалари сентябрь ойида йиллик минимумни қайд этди. Бу ҳақда Марказий банк ҳисоботида маълум қилинди.

Келгуси 12 ой учун нархлар ўсишининг ўртача прогнози 2024 йил июлидан бери биринчи марта айнан 12% ни ташкил этди. Ҳудудлар бўйича энг юқори кутилмалар Сирдарё (12,7%) ва Тошкент вилоятларида (12,6%) қайд этилди, кейинги ўринларда Қашқадарё (12,5%) ва пойтахт (12,4%) жойлашди. Инфляция бўйича энг кўп оптимизм Бухоро (10,5%), Сурхондарё (11,2%) ва Хоразм (11,4%) вилоятларида кузатилди.

Касблар кесимида кутилаётган инфляция даражаси пенционерлар (13,5%), саноат ишчилари ва қурувчиларда (13,3%) энг юқори бўлди. Энг паст прогнозлар қишлоқ хўжалигида (10,3%), талабаларда (11%) ва умумий овқатланиш соҳасида (11,1%) кузатилди.

Даромад тоифалари орасида ойига 20−30 млн сўм даромадга эга гуруҳ прогнозлари энг юқори (17,8%) бўлди. 10−20 млн ёки 30 млн сўмдан юқори даромадли гуруҳларда кутилмалар тахминан 14% ни ташкил этди, энг паст кўрсаткич эса 2 млн сўмгача даромадли гуруҳда (11%) қайд этилди.

Инфляцион кутилмаларга таъсир кўрсатувчи асосий омил уй-жой коммунал хизмат кўрсатиш тарифларининг ошиши бўлиб қолмоқда — респондентларнинг 46% и буни таъкидлаган. Иккинчи ўринда ёқилғи ва энергия нархларининг ўсиши (41%), кейинги ўринларда иш ҳақи ва нафақаларнинг ошиши (27%), транспорт харажатлари ва озиқ-овқат нархларининг ўсиши (25% дан) жойлашган.

Марказий банк томонидан сўровда қатнашган тадбиркорлар инфляциянинг пасайишига нисбатан камроқ оптимизм билдирдилар. Ўртача прогноз атиги 0,1% га — 11,7% гача пасайди, медиан кўрсаткич эса 10,4% га (+0,2%) кўтарилди.

Тошкент шаҳрида бизнеснинг инфляция бўйича кутилмалари энг юқори бўлди — 13,4%, кейинги ўринларда Самарқанд (13,3%) ва Хоразм (13,1%) жойлашди. Энг паст кўрсаткичлар Қорақалпоғистонда (10,3%), Қашқадарёда (10,4%) ва Навоийда (10,8%) қайд этилди.

ИТ ва туризм соҳасидаги тадбиркорлар тармоқлар бўйича энг юқори прогнозларни бердилар — 13,3%, логистика соҳаси 12,9% билан кейинги ўринда туради. Бошқа томондан, савдо ва саноатда (10,8%), шунингдек, қишлоқ хўжалиги соҳасида (11,1%) баҳолаш ўртача кўрсаткичдан анча паст бўлди.

Аҳоли сингари, бизнес прогнозларига ҳам биринчи навбатда коммунал хизматлар (иштирокчиларнинг 44% и) ва энергия нархларининг ўсиши (41%) таъсир кўрсатмоқда. Бошқа вариантлардан кўпинча транспорт харажатларининг ошиши (30%) ва иш ҳақининг кўтарилиши (29%) қайд этилган бўлса, валюта тебранишлари атиги 22% ни ташкил этди.