Ўзбекистонда 7,5 мингдан ортиқ тадбиркорлик субъекти норасмий иқтисодий фаолият юритиб, шубҳали операцияларни амалга оширган. Бу ҳақда Давлат солиқ қўмитаси ахборот хизмати хабар қилди.

Қўмита бизнес эгаларига ўз контрагентларини танлашда, қонунчиликда назарда тутилганидек, лозим даражада эҳтиёткорликни таъминлаш зарурлигини эслатиб ўтди.

«Бизнес ҳамкорларнинг ишончлилигини норасмий иқтисодий фаолият юритиб, шубҳали операцияларни амалга оширган 7522 та субъектлар рўйхати келтирилган Солиқ қўмитаси сайти орқали текшириш мумкин. Ушбу рўйхати мунтазам равишда янгиланиб борилади», — дейилади қўмита хабарида.

Маълум қилинишича, жорий йилнинг ўзида 902 та тадбиркорлик субъекти фаолиятида шубҳали ҳолатлар ҳамда нақдлаштириш фаолияти билан шуғулланиш ҳолатлари аниқланган.

Қўмитага кўра, контрагентларнинг ишончлилигини текширишда қуйидаги жиҳатларга эътибор қаратиш лозим:

• Молиявий ҳисоботларни сўраш ва текшириш. Ҳисоботларни тақдим этмаслик ёки ёлғон маълумотларни тақдим этиш ҳолатлари шубҳа уйғотиши лозим — ишончли тадбиркорлик субъектлари ўзининг молиявий фаолияти ҳақидаги маълумотларни яширмайди;
• Солиқ қўмитасининг расмий веб-саҳифасида реестрида мавжудлигини текшириш;
• Субъектнинг кўрсатилган манзилда ҳамда офис ва омборларнинг мавжудлигига ишонч ҳосил қилиш;
• Онлайн таҳлил ўтказиш: контрагентнинг ижтимоий тармоқда мавжудлиги, улар тўғрисидаги мулоҳазалар ва рейтинги ҳамда фаолияти ҳақидаги бошқа мавжуд маълумотларни олиш.

Солиқ кодексига мувофиқ, контрагентда норасмий иқтисодий фаолият юритганлик ҳолатлари аниқланган тақдирда, солиқ органлари айрим операцияларни эътиборга олмасликка ҳамда тўланиши лозим бўлган солиқлар суммаларини ўзгартиришга ҳақли. Бундай субъектлар билан ҳамкорлик қилиш солиқ тўлашдан бўйин товлаш сифатида қаралиши мумкин, дея қўшимча қилади қўмита.