25 ноябрь куни президентнинг «Қонунчиликдаги ҳуқуқий бўшлиқларни бартараф этиш ва тартибга солиш юкини камайтириш тўғрисида»ги фармони қабул қилинди. Бу ҳақда Адлия вазирлигининг Ҳуқуқий ахборот каналида хабар берилди.

Ҳужжатга кўра, амалда ўз аҳамияти ва долзарблигини йўқотган 800 га яқин қонунчилик ҳужжатлари «тартибга солиш гильотинаси» орқали бекор қилинади.

Фармон билан Тадбиркорлик ва бошқа соҳалардаги айрим мажбурий талабларни қисқартириш, тартибга солишни соддалаштириш бўйича «йўл харитаси» тасдиқланди.

Жумладан, тадбиркорлар учун молиявий операцияларни E-aktiv тизимида акс эттириш мажбурияти бекор қилинади. Кўчмас мулкка нисбатан гаров ҳуқуқини рўйхатга олишда давлат хизмати нархи 2 бараварга камайтирилади.

Шахсий эҳтиёж учун мамлакатга олиб кириладиган товарларнинг божсиз олиб кириш нормалари тўлиқ қайта кўриб чиқилади.

Ер участкасига бўлган ҳуқуқни ўзига боғлиқ бўлмаган сабабларга кўра рўйхатдан ўтказмаган ногиронлиги бўлган шахсларга муқобил ҳужжатлар асосида солиқ имтиёзларидан фойдаланиш имкони яратилади.

Ҳукумат қарори билан жорий йилнинг 1 майидан жисмоний шахслар томонидан шахсий эҳтиёж учун олиб кириладиган товарларнинг божсиз олиб кириш нормалари ҳаво транспортида — $1000, темир йўл ва дарё транспортида — $500, автомобиль ва пиёда ўтиш пунктларида — $300, халқаро курьерлик жўнатмаларида — $200 ҳамда почта орқали $100 этиб белгиланган. Божсиз олиб кириш нормасидан ортиқ қисмига 30% тўлов ундирилади.

Шу билан бирга, 20 июлдан нотижорат мақсадларида товарларни олиб кириш учун хорижда бўлиш тартиби қуйидагича белгиланди:

• темир йўл ва дарё транспортида ҳамда автомобиль ўтказиш пунктлари орқали киришда — 2 кун;
• ҳаво транспортида — 3 кундан кам бўлмаслиги керак.

Октябрь ойида Юксалиш умуммиллий ҳаракати Ўзбекистонда товарларни божсиз олиб кириш нормаси фуқароларга қўшимча харажат юклаб, бозордаги рақобатга таъсир кўрсатаётганини билдирганди. Ташкилот импорт божларини пасайтиришга чақирганди.