Миллиардер Илон Маск ўзининг Twitter саҳифасида Tesla автомобиль ижараси хизматларини кўрсатувчи Hertz компанияси билан ҳали шартнома имзоламаганини маълум қилди. Битим Tesla’га 4,2 миллиард долларга яқин даромад келтириши керак эди.

Тошкент вақти билан соат 14:36 ҳолатига кўра, NASDAQ биржасида электромобиллар ишлаб чиқарувчи Tesla акциялари 5,5 фоизга арзонлашиб, ҳар бир акция нархи 1142,4 долларни ташкил қилди. Энг юқори нуқтада пасайиш 7 фоиздан ошди ва нарх 1122 долларгача тушди.

Қимматли қоғозлар савдоси компания асосчиси Илон Маск Tesla ҳалигача Hertz Global Holdings билан электромобилларнинг катта партиясини етказиб бериш бўйича шартнома имзоламаганини эълон қилганидан кейин бошланди. Автомобиль ижараси хизмати Hertz Tesla’га ўтган ҳафтада тахминан 4,2 миллиард долларлик 100 мингта автомобилга рекорд даражадаги буюртма берганди.

Аввал хабар берилганидек, Hertz Global Holdings Inc 100 мингта электромобилга буюртма бергани сабаб Tesla акциялари кескин кўтарилди. Bloomberg манбаларига кўра, бу келишув Tesla компаниясига 4,2 миллиард доллар фойда келтириши тахмин қилинганди. Reuters ушбу буюртмани Маск компанияси учун энг катта буюртма деб атагади.

Шунингдек, Илон Маск Twitter’да БМТнинг Жаҳон озиқ-овқат дастури бош директорига мурожаат йўллаб, агар дунёдаги очлик муаммосини ҳал қила олса, Tesla акцияларини сотишга тайёрлигини маълум қилди.