Реал вақт режимида янгиланиб борадиган Forbes Real-Time рейтингига кўра, Tesla ва SpaceX асосчиси Илон Маскнинг бойлиги 9,50 фоизга ошиб, 251,4 миллиард долларга етди.

Миллиардер Forbes рейтингида дунёнинг энг бой одамлари орасида биринчи ўринни эгаллаб турибди. Унинг бойлиги Тошкент вақти билан 23:40 ҳолатига кўра, Tesla акцияларининг ўсиши фонида 21,8 миллиард долларга ошиб, 251,4 миллиард долларни ташкил қилмоқда. Компания акцияларининг қиймати 1000 долларга яқинлашди. Бу 2020 йил Tesla’нинг бўлинишидан кейинги энг юқори кўрсаткичдир.

Аввал хабар берилганидек, Hertz Global Holdings Inc 100 мингта электромобилга буюртма бергани сабаб Tesla акциялари кескин кўтарилди. Bloomberg манбаларига кўра, бу келишув Tesla компаниясига 4,2 миллиард доллар фойда келтиради. Reuters ушбу буюртмани Маск компанияси учун энг катта буюртма деб атади.

Ўтган ҳафта Tesla 13,76 миллиард долларлик рекорд даромад ва учинчи чоракда 1,62 миллиард долларлик соф даромадни эълон қилганди. Электромобиль ишлаб чиқарувчиси яримўтказгичлар танқислиги билан курашишда анъанавий автомобиль ишлаб чиқарувчиларга қараганда анча яхши кўрсаткич қайд этган.

Credit Suisse таҳлилчиси Дэн Леви буни компания дастурий таъминотнинг кўп қисмини мустақил равишда яратиши ва керак бўлганда тезда чипларга ўтишга қодирлиги билан изоҳлади.

Аввалроқ Tesla компаниясининг нархи 1 триллион доллардан ошгани ҳақида хабар берилганди.