Марказий банк депозит операциялари бўйича аукцион ўтказилишини эълон қилди
Жалб қилинадиган маблағларнинг миқдори 1 триллион сўмдан ошмайди
Ўзбекистон Марказий банки 2021 йил 4 ноябрь куни республика валюта биржаси савдо тизимида депозит операциялари бўйича аукцион ўтказилишини маълум қилди. Бу ҳақда банк матбуот хизмати хабар берди.
Қайд этилишича, аукцион 4 ноябрь куни американча усулда бўлиб ўтади. Аризаларни қабул қилиш вақти 10:30 дан 11:00 гача этиб белгиланган. Депозит муддати 14 кун ҳамда жалб қилинадиган маблағларнинг максимал миқдори 1 триллион сўмга тенг. Шунингдек, аукцион бўйича максимал фоиз ставкаси 14 экани кўрсатилган.
Хабарга кўра, аукцион натижалари бўйича аризаларни қондириш вақти 11:00 бўлиб, маблағларни депозитга ўтказиш вақти 4 ноябрь 13:00 гача, депозит суммасини ва унга ҳисобланган фоизларни тўлаш вақти 18 ноябрь 10:00 гача этиб белгиланган. Рақобатсиз аризаларнинг максимал улуши нолга тенг экани қўшимча қилинган.
Аввалроқ, Марказий банк макроиқтисодий ривожланиш бўйича 2 та сценарий эъон қилгани ҳақида хабар берилганди. Шунингдек, «Фарғонаазот»нинг устав капиталидаги акция пакетлари хусусийлаштирилиши хабар қилинди.
