«Ўзбекнефтгаз» Лондон фонд биржасига 700 млн долларгача еврооблигациялар чиқаради
Вазирлар Маҳкамаси қарори 4 ноябрда кучга кирган
Ўзбекистон Вазирлар Маҳкамасининг 3 ноябрдаги «Нефть ва газ тармоғи трансформациясини амалга оширишда ташқи молиялаштириш манбаларини диверсификация қилишнинг қўшимча чора-тадбирлари тўғрисида»ги қарори қабул қилинди. Бу ҳақда Norma хабар берди.
Маълум қилинишича, давлат кафолати иштирокисиз хорижий инвестицияларни жалб қилиш, «Ўзбекнефтгаз» компаниясини молиявий соғломлаштириш мақсадида 2021 йил ноябрь ойида Лондон фонд биржасида 700 миллион доллар миқдоригача «Ўзбекнефтгаз»нинг еврооблигацияларини чиқариш ва жойлаштириш ташкиллаштирилади.
Қайд этилишича, Ўзбекистон Молия вазирлиги ва «Ўзбекнефтгаз»нинг халқаро облигацияларни чиқариш ва жойлаштиришдан тушган маблағларни компаниянинг ғазначилик ҳисобрақамига ўтказиш ҳамда уларни Молия вазирлиги билан келишган ҳолда ишлатиш тўғрисидаги таклифи маъқулланган.
«Ўзбекнефтгаз» халқаро облигацияларни чиқаришда барча қабул қилинган молиявий шартларни ўз муддатида бажариши, шунингдек маблағларни сарфлаш йўналишларини ёритиб бериши шарт экани хабарда таъкидланган.
«Ўзбекнефтгаз»га, истисно тариқасида, халқаро облигацияларни чиқариш ва жойлаштириш доирасида тўғридан-тўғри музокаралар асосида ҳамда Иқтисодий тараққиёт ва камбағалликни қисқартириш вазирлиги ҳузуридаги «Лойиҳалар ва импорт контрактларни комплекс экспертиза қилиш маркази» ДУКдан экспертиза ва рўйхатдан ўтказмасдан қуйидаги компаниялар билан шартномаларни ва уларга қўшимча келишувларни имзолашга рухсат берилган:
- Ernst & Young халқаро аудиторлик ташкилоти билан «Ўзбекнефтгаз» АЖнинг 2021 йил молиявий ҳисоботларини ташқи аудитдан ўтказиш ва аудиторлик ташкилотнинг комфорт хатини бериш хизматларини бажариш бўйича;
- ташкилотчи компаниялар ёки уларнинг аффилланган шахслари билан хизматлар кўрсатиш бўйича;
- ишончли вакил — BNY Mellon Corporate Trustee Services Limited, тўлов агенти — The Bank of New York Mellon (Лондон филиали), листинг ва рўйхатга олувчи агент — The Bank of New York Mellon SA/NV (Дублин филиали) компаниялари билан тегишли процессуал хизматлар кўрсатиш бўйича;
- Лондон фонд биржаси билан халқаро облигацияларни жойлаштириш бўйича.
Маълумот ўрнида, ҳужжат қонун ҳужжатлари маълумотлари миллий базасида эълон қилинган ва 4 ноябрь куни кучга кирган.
Аввалроқ «Ўзбекнефтгаз» барча харидлар электрон шаклга ўтказилишини маълум қилганди.
