Ўзбекистонда маҳсулотнинг сохта ёки асллигини аниқлаб берувчи тизим яратилади
Тартиб «Асл белгиси» миллий ахборот тизими доирасида жорий этилади
Ўзбекистонда «Асл белгиси» миллий ахборот тизими доирасида маҳсулотларни мажбурий рақамли маркировкалаш тартиби жорий этилади. Бу ҳақда Истеъмолчилар ҳуқуқларини ҳимоя қилиш агентлиги матбуот хизмати хабар берди.
Маълум қилинишича, Вазирлар Маҳкамасининг 2020 йил 20 ноябрдаги «Айрим турдаги маҳсулотларни мажбурий рақамли маркировкалаш тизимини жорий этиш тўғрисида»ги қарори қабул қилинган бўлиб, қарорда маҳсулотларни мажбурий рақамли маркировкалаш тартиби «Асл белгиси» миллий ахборот тизими доирасида жорий этилиши кўзда тутилган.
Қарорга кўра, мажбурий рақамли маркировкалаш талаби жорий қилинадиган маҳсулотларга тамаки, алкоголь ва пиво маҳсулотлари киради, 2022 йил 1 февралдан бошлаб эса ушбу рўйхатга дори воситалари, сув ва ичимликлар ҳамда маиший техника воситалари қўшилиши белгиланган. Келгусида тизим мажбурий рақамли маркировкалаш лозим бўлган товарлар рўйхатини кенгайтиришни назарда тутади.
Таъкидланишича, бундай тизим ёрдамида Ўзбекистон истеъмолчилари мобил иловадан фойдаланган ҳолда маҳсулотларнинг асллигини текшириш ва товар ҳақида тўлиқ маълумот олиш имкониятига эга бўлади. Ишлаб чиқарувчи, таркиби ва бошқа маълумотлар, агар сохта маҳсулот аниқланса, қоидабузарлик ҳақида хабар берилиши мумкин.
Аввалроқ Ўзбекистон аэропортларида мультипортли бошқарув тизими жорий этилиши ҳақида хабар берилганди.
