Дунё бўйича инвесторлар инфляция туфайли кафолатсиз активларга кўпроқ қизиқиш билдирмоқда. Бу ҳақда The Wall Street Journal хабар берди.

Қайд этилишича, бунинг сабабларидан бири шундаки, инфляция давлат облигацияларининг даромадлилигини пасайтиради, бу акцияларга асосий муқобилдир. Ушбу ҳафта АҚШда инфляция таъсирини ҳисобга олган ҳолда 10 йиллик Ғазначилик облигациялари бўйича реал даромадлилик минус 1,2 фоизга тушиб кетди. Бу Tradeweb компанияси статистик маълумотларни юритишни бошлаган камида 2003 йил февраль ойидан бери энг паст кўрсаткичдир.

Нашрнинг ёзишича, облигациялар бўйича пул йўқотишлари истиқболи бозор иштирокчиларини кафолатсиз активларга сармоя киритишга мажбур қилади. WSJ Tesla’нинг рақиби Rivian’нинг IPO’сини мисол қилиб келтирди: компания мижозларга автомобилларни илк марта етказиб беришни сентябрь ойида бошлаган, бироқ IPO’дан сўнг унинг капиталлашуви АҚШдаги икки йирик автомобиль ишлаб чиқарувчиси Ford ва General Motors’нинг бозор қийматидан ошиб кетган.

Жойлаштириш ҳар бир акция учун 78 доллардан нарх оралиғининг юқори чегарасида бўлиб ўтди. Rivian акциялари қимматлашда давом этди ва кейинги кунларда уларнинг нархи 12 ноябрдаги савдолар якуни бўйича ҳар бир акция учун 129,95 долларга қадар кўтарилди.

«Салбий реал рентабеллик кўпроқ таваккал қилишни рағбатлантиради. Мен ҳақиқатан ҳам бу акцияларнинг юқорига силжишига сабаб бўлганига ишонаман», — дейди Pictet Asset Management капитал менежери Шаниел Рамжи.

Бундан ташқари, биткоин жорий ҳафтада янги рекорд ўрнатди: криптовалютанинг қиймати биринчи марта 68 500 доллардан ошди. WSJ маълумотларига кўра, асосий фонд индекслари ҳафта давомида бироз пасайган бўлсада, улар ўзларининг рекорд қийматларидан атиги 2 фоиз пастроқ.

Нашрнинг қўшимча қилишича, технологик акциялар, айниқса, облигациялар даромадлилигининг пасайишидан фойда кўрди: Nasdaq IT-индекси бир ой ичида қарийб 10 фоизга ўсди. Кўпроқ молиявий ва саноат компанияларини ўз ичига олган Dow Jones индексидан икки бараварга ошди.

Аввалроқ Билл Гейтс нефть гигантларининг қиймати пасайишини башорат қилганди.