Марказий банк VISA тизими билан кибертаҳдидлар ва фирибгарлик тенденцияларини муҳокама қилди
VISA мутахассислари хавф-хатарларни кузатиш ва юқори рискли фаолиятни тартибга солиш бўйича тажрибалари билан ўртоқлашди
Ўзбекистон Марказий банкида VISA халқаро тўлов тизими билан ҳамкорликда рискларни бошқариш масалаларига бағишланган семинар ташкил этилди. Бу ҳақда банк матбуот хизмати хабар берди.
Қайд этилишича, VISA халқаро тўлов тизими мутахассислари хавф-хатарларни кузатиш ва юқори рискли фаолиятни тартибга солиш бўйича ўз тажрибалари билан ўртоқлашган. Шунингдек, кибертаҳдидлар ва фирибгарликнинг долзарб тенденциялари, VISA’нинг мавжуд риск дастури муҳокама қилиниб, савдо тармоғидаги хатарларни назорат қилиш ва агентлар билан ишлаш бўйича хизмат кўрсатувчи банкларда VISA талаблари кўриб чиқилган.
«Мутахассисларнинг таъкидлашича, киберхавфсизлик мавзуси йилдан-йилга долзарб бўлиб бормоқда. Бугунги кунда аксарият ҳужумлар ҳали ҳам ижтимоий инженерия усулларидан фойдаланган ҳолда амалга оширилмоқда, яъни улар одамларнинг ишонувчанлигидан ёки бепарволигидан фойдаланадилар. Шу боис аҳолининг киберсаводхонлигини ошириш, шунингдек, банк ходимлари малакасини юксалтириш фирибгарлик хавфини камайтиришда муҳим аҳамиятга эга», дейилади хабарда.
Форум якунлари бўйича иштирокчилар кибертаҳдидлар ва фирибгарликнинг олдини олишда ўзаро ҳамкорликни янада ривожлантириш зарурлиги юзасидан фикр билдирган.
Аввалроқ Visa йирик бозорларда карта тўловлари учун комиссияни пасайтириши ҳақида хабар берилганди.
