Ўзбекистон 10 ойда 14 та давлатга оёқ кийим экспорт қилган. Бу ҳақда Давлат статистика қўмитаси матбуот хизмати хабар берди.

Маълумотларга кўра, Ўзбекистон 2021 йилнинг январь-октябрь ойларида 14 та хорижий давлатга қиймати қарийб 30 миллион долларга тенг бўлган оёқ кийимлар экспорт қилган. Шунингдек, оёқ кийим экспорти ўтган йилнинг мос даврига нисбатан 1,8 миллион долларга кам.

Қайд этилишича, 2021 йилнинг 10 ойида Ўзбекистон қуйидаги давлатларга энг кўп оёқ кийим экспортини амалга оширган:

1. Қирғизистон — 16,5 миллион доллар;
2. Қозоғистон — 7 миллион доллар;
3. Тожикистон — 4,5 миллион доллар;
4. Россия — 861 минг доллар;
5. Афғонистон — 631 минг доллар.

Бундан ташқари, 2021 йилнинг 10 ойида хорижий давлатларга энг кўп оёқ кийим экспорт қилган ҳудудлар қуйидагича:

1. Андижон вилояти — 12,8 миллион доллар;
2. Самарқанд вилояти — 6,5 миллион доллар;
3. Фарғона вилояти — 6 миллион доллар;
4. Тошкент вилояти — 1,9 миллион доллар.

Аввалроқ Ўзбекистон энг кўп оёқ кийим импорт қилаётган давлатлар рейтинги эълон қилинганди.