Рейтинг. Офис ижараси бўйича дунёнинг энг қиммат шаҳарлари
Силикон водийсидаги офислар кучли 5 таликдан жой олди.
Офис ижараси нархи бўйича Гонконг ва Нью-Йорк етакчи бўлди. Бу ҳақда JLL компанияси томонидан ўтказилган тадқиқотда сўз боради.
Қайд этилишича, 2021 йилда қиммат офислар рейтингининг анъанавий етакчиси — Нью-Йоркда жойлашган Мидтаун бу сафар биринчиликни Гонконг билан бўлишган. Бунга юқори талаб ва ижара нархларининг ошиши сабаб бўлган. Ушбу шаҳарларда жойлашган офисларнинг ижараси бир квадрат метр учун йилига 2900 долларни ташкил қилади.
Кучли бешликка бир квадрат метрнинг ижара нархи 2200 долларга тенг Пекиндаги молиявий кўча, Лондоннинг Вест-Энд (ижара нархи 2100 доллар) ва Силикон водийси (квадрат метри 1900 доллар) кирган.
«Лента» нашрига кўра, Москванинг кўчмас мулк бозори 40-ўринни эгаллаган. У ердаги офисларнинг квадрат метри йилига 780 долларни ташкил қилади.
Тадқиқотга кўра, дунёда экологик биноларга бўлган юқори талаб туфайли премиум классидаги кўчмас мулк тушунчаси ўзгариб бормоқда. JLL маълумотларига кўра, премиум офисларнинг 84 фоизи атроф-муҳитни муҳофаза қилиш сертификатларига эга. Энг ривожланган бозорларда бу кўрсаткич 100 фоизга етади. Ушбу динамика уй эгалари ва ижарачиларнинг экологик биноларга интилаётганини кўрсатади.
Тадқиқотга кўра, йирик ижарачиларнинг аксарияти шаҳар марказларида офисларни ижарага олишни хоҳлайди, бу эса шаҳарнинг маркази ва бошқа қисмлари ўртасидаги ижара нархи бўйича фарқни кенгайтиради. Пандемия даврида келажаги сўроқ остида бўлган бизнес ҳудудлар иш ва офис майдонига янгича ёндашув сабаб яна диққат марказида.
Аввалроқ Forbes дунёнинг энг нуфузли аёллари рейтингини эълон қилгани хабар қилинганди.