Туркияда инфляция 48,69 фоизга тезлашиб, 2002 йилдан бери энг юқори кўрсаткични қайд этди. Бу ҳақда Туркия Статистика институти хабар бермоқда.
Маълум қилинишича, Туркияда йиллик инфляция январь ойида 48,69 фоизга тезлашган. Бу кўрсаткич 2002 йил октябридан бери энг юқори кўрсаткичдир. 2021 йилнинг декабрь ойига нисбатан кўрсаткич 12,61 фоизга ошган. Туркия Молия вазирлиги апрель ойида инфляциянинг энг юқори чўққисини башорат қилмоқда.
Январь ойида Туркияда истеъмол нархлари индексининг ўсиши 11,10 фоизни ташкил этган. 2021 йилнинг декабрь ойида эса бу кўрсаткич 13,58 фоизга ошган.
Охирги рекорд даражадаги инфляция даражаси 2002 йилнинг ноябрида Адолат ва тараққиёт партияси Ражаб Тоййиб Эрдўғон раислигида ҳокимиятга келишидан олдин қайд этилган эди. Ўша пайтда инфляция 33,45 фоизни ташкил қилган.
Қайд этилишича, 2021 йилнинг декабрь ойида Эрдўғон мамлакат фуқароларини ўз жамғармаларини лирада сақлашга чақириб, бутун мамлакатдаги валюта инқирози назорат остида эканлигига ишонтирган. Шунингдек, ўтган ҳафта Туркия президенти мамлакатдаги юқори нархлар ва инфляция муаммоси имкон қадар тезроқ ҳал этилишини айтган эди.
Турк валютасининг қулаши 2021 йилнинг декабрь ойида Миллий Марказий банкнинг фоиз ставкасини 14 фоизга тушириш қароридан кейин содир бўлган. Йил давомида турк валютаси тахминан 50 фоизга арзонлашган. Ноябрь ойида Туркия валютасининг сўнгги 20 йилдаги энг йирик қулаши фонида Анқара ва Истанбулда оммавий норозилик намойишлари бўлиб ўтган.
Аввалроқ Туркия молия вазири инфляциянинг энг юқори чўққисини прогноз қилгани ҳақида хабар берилганди. Шунингдек, Эрдўғон инфляция ҳақидаги ахборотдан сўнг статистика бошқармаси бошлиғини ишдан олгани хабар қилинди.
