Туркия Президенти Ражаб Тоййиб Эрдўғон инфляция ҳақида ахборот эълон қилинганидан сўнг статистика бошқармаси бошлиғини ишдан олди. Бу ҳақда Financial Times хабар берди.

Маълум қилинишича, Туркия Президенти Ражаб Тоййиб Эрдўғон миллий статистика институти раҳбари Саит Эрдал Динчерни мамлакатдаги инфляция маълумотлари туфайли зиддият юзага келгани ҳақидаги хабарлардан сўнг ишдан бўшатган.

Эрдўғон декабрь ойида расмий инфляция даражаси 19 йиллик максимал — 36 фоизга етгани ҳақида ахборот эълон қилинганидан сўнг Саит Эрдал Динчерни ишдан бўшатиш тўғрисида буйруқ чиқарган. Динчер бу лавозимда атиги 10 ой ишлаган. Унинг ўрнига аввалроқ мамлакат банк фаолиятини тартибга солиш органи раиси ўринбосари лавозимида ишлаб келган Эрҳан Четинкая тайинланган.

Динчернинг лавозимидан четлатилиши Туркия оммавий ахборот воситаларида у ва Эрдўған ўртасидаги расмий инфляция кўрсаткичлари ошиб бораётгани бўйича келиб чиққан тарангликнинг бир неча ҳафта давомида муҳокама қилинганидан сўнг содир бўлган. Шу билан бирга, «Туркстат» мухолифат партиялари томонидан босим остида бўлган, улар бошқармани инфляция маълумотлари ҳақида кам ҳисобот беришда айблаган. Динчер бу айбловларни рад этган.

Декабрь ойида Эрдўғон молия вазири Лутфи Элванни ишдан бўшатган эди. Охирги икки йил ичида у мамлакат марказий банкининг учта раҳбарини ҳам ишдан бўшатган.

Эрдўғоннинг фикрича, Туркия юқори фоиз ставкалари ва кучли капитал оқимини биринчи ўринга қўйган аввалги иқтисодий сиёсатдан воз кечиш орқали ўзини чет эл капиталига қарамликдан халос қилиши мумкин. Унинг ғоялари замирида фоиз ставкаларининг пасайиши истеъмол нархлари ўсишини ҳам жиловлайди, деган ишонч ётади. Бу дунё марказий банкирларининг консенсус фикрига мутлақо зиддир.

Қайд этилишича, 2021 йилда Туркия Марказий банки асосий ставкани тўрт марта — 19 фоиздан 14 фоизга пасайтирган. Бу фонда лира икки баравардан кўпроққа қадрсизлашган. Йил охирида ҳукумат томонидан кўрилган фавқулодда чоралардан сўнг валюта курси барқарорлашган.

Аввалроқ Туркия молия вазири инфляциянинг энг юқори чўққисини прогноз қилгани ҳақида хабар берилганди. Шунингдек, Туркияда инфляция бир йил ичида 36 фоиздан ошгани хабар қилинди.