Туркия молия вазири Нуреддин Небати иқтисодчилар билан ёпиқ йиғилиш чоғида мамлакатдаги инфляция яқин ойларда тахминан 40 фоизга чиқишини ва 2022 йилнинг охиригача 50 фоиздан ошмаслигини айтди. Бу ҳақда Bloomberg аноним қолишни истаган учрашув иштирокчиларига таяниб ёзмоқда.

Қайд этилишича, Небати, шунингдек, инфляция эҳтимол бу йил охиригача 30 фоиздан пастга тушмаслигини ҳам тан олган. Вазирнинг ўзи агентликка изоҳ беришдан бош тортган.

Учрашувда Молия вазирлиги раҳбари Туркия Марказий банки фоиз ставкасини оширишни режалаштирмаётганини, лекин ҳозирда банкларга узоқ муддатли лойиҳа кредитлари бўйича рискларни ҳимоя қилишга ёрдам берадиган узоқ муддатли молиялаштириш лойиҳаси устида иш олиб бораётганини қўшимча қилган.

Маълумот ўрнида, йил бошидан буён лиранинг долларга нисбатан курси деярли икки баравар, ноябрь ойида эса 26 фоизга пасайган. Лиранинг тушишига асосий сабаб инфляция тезлашишига қарамай (ноябрда у 20 фоиздан ошди) асосий ставкани камайтиришни талаб қилаётган Президент Ражаб Тойиб Эрдоғаннинг позицияси бўлиб келди. Мамлакат Молия вазирлигининг собиқ раҳбари Лутфий Элъван лиранинг қадрсизланиши фонида истеъфога чиқди.