Биткоин нархи АҚШ меҳнат бозоридаги вазият яхшиланиши фонида кўтарилди. Бу ҳақда Bloomberg хабар берди.

Маълумотларга кўра, 7 февраль куни криптовалюталар нархи АҚШда иш ўринлари сони тўғрисидаги ахборот эълон қилингандан сўнг, бозорлардаги рискнинг умумий кайфияти фонида кўтарилган.

Қайд этилишича, биткоин ўтган кун давомида 2,8 фоизга ошиб, 42 минг 861 долларни ташкил қилган. Шу билан бирга криптовалюта икки ойдан ортиқ вақт ичида биринчи марта 50 кунлик ўртача нархидан ошиб кетган.

Шундай қилиб, биткоин 2021 йилнинг ноябрь ойида эришилган энг юқори кўрсаткичдан (68,99 минг доллар) пастлигича қолмоқда. Бироқ январь ойида белгиланган энг сўнгги минимал қийматдан (33 минг доллар) юқоридир.

Дунёда энг кенг тарқалган иккинчи криптовалюта бўлган Ethereum 3,14 фоизга ошиб, 3089 долларга етган. 5–6 февраль кунлари эфир нархи икки ҳафта ичида биринчи марта 3 минг доллардан ошган.

GlobalBlock брокерлик компанияси таҳлилчиси Маркус Сотириуга кўра, 7 февраль куни АҚШ меҳнат бозоридаги маълумотларга ижобий муносабат криптовалюта бозорида тикланишни келтириб чиқарган. Меҳнат вазирлиги январь ойида мамлакат иқтисодиётида иш ўринлари сони 467 мингтага ошгани, ўртача ўсиш прогнози эса 125 мингтани ташкил этгани ҳақида хабар берганди.

Иш ўринлари сонининг кутилмаган ўсиши «омикрон»нинг янги штамми тарқалишига қарамай содир бўлган. Баъзи экспертлар январь ойида бу кўрсаткич ҳатто камайиши мумкинлигини ҳам истисно қилмаганди.

Сотириунинг сўзларига кўра, биткоин 44 минг–45 минг доллар даражасида кучли қаршиликка дуч келади. Сабаби биржадаги ноаниқлик сақланиб қолади.

Дунёдаги етакчи электромобил ишлаб чиқарувчи Tesla Inc. 31 декабрь ҳолатига кўра унинг 1,99 миллиард долларлик биткоин захиралари борлигини маълум қилган. Компания 2021 йилнинг биринчи чорагида 1,5 миллиард долларга биткоин сотиб олди.-Компания криптовалютанинг қадрсизланиши даврида 101 миллион доллар йўқотган, лекин у март ойида биткоинларнинг бир қисмини сотиш орқали ҳам 128 миллион доллар фойда кўрган.

Аввалроқ биткоин курси тушиши сўнги олти ойдаги минимумни янгилагани хабар қилинганди. Шунингдек, Twitter асосчисининг тўлов компанияси биткоин «қазиб олиш» тизимини яратиши ҳақида хабар берилди.