Twitter асосчиси Жек Дорсининг Block номли криптовалюта компанияси биткоин «қазиб олиш» тизимини яратади. Бу ҳақда компания вакили Томас Темплтон ўзининг Twitter саҳифасида ёзган.

Қайд этилишича, Block компаниясининг мақсади — майнингни барча босқичларда янада тақсимланган ва самарали қилиш.

Таъкидланишича, майнинг жараёнини янада қулайроқ қилиш ғояси янги биткоинларни ишлаб чиқариш билан боғлиқ. Block буни тўлиқ марказлашмаган ва эркин келажак учун узоқ муддатли эҳтиёж сифатида кўрмоқда. Майнинг — тобора мураккаблашиб бораётган ҳисоблаш муаммоларини ҳал қилиш орқали янги биткоинларни яратиш жараёни.

«Майнинг кўпроқ тақсимланиши керак. У қанчалик марказлашмаган бўлса, биткоин тармоғи шунчалик чидамли бўлади», — деб ёзган эди Жек Дорси октябрь ойида.

Block бозорга кириш учун битта асосий тўсиқни енгиб ўтиши керак: майнинг ускунасини топиш қийин, нархи қиммат ва етказиб бериш унданда мушкул.