2020 йилда COVID-19 пандемияси туфайли бутун дунё бўйлаб ижодий соҳаларда 10 миллион одам ишсиз қолди. Бу ҳақда The Guardian UNESCO ҳисоботига таяниб хабар берди.

Халқаро ташкилот ҳисоботида ушбу тенденция «мисли кўрилмаган инқироз» дея таърифланган.

UNESCO маълумотларига кўра, пандемиядан айниқса, музейлар ва галереялар қаттиқ зарар кўрган. Улар бир неча ой давомида ёпиқ туришга мажбур бўлган. Бунинг оқибатида 2020 йилда маданият соҳасининг глобал ялпи қиймати 750 миллиард долларга камайган.

Ташкилот, шунингдек, жуда катта йўқотишларга қарамай — 10 миллион иш ўрни, ижодий соҳанинг кўплаб ходимлари ҳанузгача хавф остида эканлигидан хавотирда. UNESCO «мисли кўрилмаган инқироз»нинг асосий сабаби сифатида пандемиядан олдин бошланган санъатга ва санъаткорларни қўллаб-қувватлашга қаратилган давлат харажатининг камайишини кўрмоқда.

«Рассомлар учун ижтимоий ҳимоя тизими кўплаб мамлакатларда COVID-19 тарқалишидан олдин ҳам самарасиз эди. Бироқ, пандемия маданият ва ижодий соҳа ходимларининг қанчалик ҳимоясиз эканлигини яққол кўрсатди», дейилади ҳисоботда.

Ҳисобот муаллифлари тадқиқот натижаларига кўра, бутун дунё ҳукуматларига ижодий индустриядаги ишчиларнинг меҳнат шароитларини яхшилашни тавсия қилган: энг кам иш ҳақини белгилаш, пенсия тизимини қайта кўриб чиқиш ва фрилансерлар учун касаллик бўйича нафақа фондини яратиш.

«Биз маданият ва санъат мутахассислари учун барқарор ва инклюзив иш муҳитини яратишга ёндашувимизни қайта кўриб чиқишимиз керак. Зеро, бу соҳалар бутун дунё жамияти учун муҳим ўрин тутади», — дейди UNESCO Бош директорининг маданият бўйича ёрдамчиси Эрнесто Оттоне.