Португалия Европа Иттифоқи санкцияларига учраган миллиардер Абрамовичга мамлакатга киришни рад эта олмаслигини маълум қилди. Мамлакат расмийлари буни миллиардернинг яқинда Португалия фуқаролигини олгани билан изоҳлади. Бу ҳақда Reuters ёзмоқда.
Португалия ташқи ишлар вазири Аугушту Сантуш Силванинг таъкидлашича, мамлакат Сефард яҳудийларининг авлодларига фуқаролик бериш тўғрисидаги қонунни кучайтирган, ушбу қонун Абрамовичга 2021 йили фуқароликни олиш имконини берган. Бироқ, бу ўзгаришлар тескари кучга эга бўлмайди.
Таъкидланишича, Португалия миллиардерга қарши Европа Иттифоқи томонидан қабул қилинган бошқа санкцияларни амалга оширишга тайёр.
Январь ойида Португалия прокуратураси Абрамовичга фуқаролик берилишининг қонунийлигини текширишга қарор қилганди. Текширув натижаларига кўра, тадбиркор Португалия паспортидан маҳрум этилиши мумкин. Фуқароликка даъвогарларнинг маълумотлари экспертлар томонидан мамлакатнинг яҳудий марказларидан бирида — Лиссабон ёки Портуда текширилади.
Қайд этилишича, Абрамовичнинг маълумотлари Портудаги марказ томонидан тасдиқланган ва январь ойида миллиардернинг фуқароликка қабул қилиниши бир қанча «энг нуфузли халқаро яҳудий институтлари» томонидан маъқулланганини айтган. Абрамовичнинг матбуот котиби бирор қонунбузарлик бўлганини рад этди.
Шунингдек, ўтган ҳафта Портуда пул ювиш, коррупция, фирибгарлик ва ҳужжатларни қалбакилаштиришда гумон қилиниб, Абрамовичга Португалия паспортини олишга рухсат берувчи ҳужжат берган раввин, маҳаллий яҳудий жамоати раҳбари Даниел Литвак ҳибсга олинган эди. Портудаги яҳудий жамоати қонунбузарлик бўлганини рад этмоқда.
Аввалроқ Португалия Буюк Британиянинг Абрамовичга қарши киритилган санкцияларига муносабат билдиргани хабар қилинганди. Шунингдек, Роман Абрамовичнинг Америка ҳеж-фондларидаги активлари музлатилгани ҳақида хабар берилди.
