Роман Абрамовичнинг Америка ҳеж-фондларидаги активлари музлатилди
Миллиардер февраль ойи охиридан бери иккиламчи бозорда активларини сотишга ҳаракат қилган.
Миллиардер Роман Абрамовичнинг АҚШ ҳеж-фондларидаги активлари Буюк Британия санкциялари туфайли музлатиб қўйилди. Бу ҳақда The Wall Street Journal манбалари хабар берди.
Маълум қилинишича, Буюк Британия санкциялари киритилгандан сўнг Американинг бир қатор ҳеж-фондларига миллиардер Роман Абрамовичнинг активларини музлатишга буйруқ берилган. Абрамович кўп йиллар давомида Нью-Йоркда жойлашган Concord Management маслаҳатчиси орқали ҳеж-фондга киритилган инвестициялардан фойдаланиб келган.
«Ҳозирда Роман Абрамовичга тегишли ҳисоблар транзакциялар учун блокланган, шунинг учун ҳар қандай сарфлаш, сотиб олиш амаллари ёки тўловларни амалга ошириб бўлмайди, обуна ёки бадалларни қабул қилиш имконсиз», — деди SS&C Globe Op жамғармаси маъмури.
Манбаларга кўра, музлатиш буйруғи Абрамовичнинг ўз улушларини кўплаб ҳеж-фондларда сотишга бўлган сўнгги уринишларига чек қўяди. Уларнинг сўзларига кўра, Абрамович камида февраль ойининг охиридан бери иккиламчи бозорда маблағ сотишга ҳаракат қилган.
Абрамович ва Concord Management матбуот котиби изоҳ сўровларига жавоб бермаган.
Аввалроқ Португалия Буюк Британиянинг Абрамовичга қарши киритилган санкцияларига муносабат билдиргани хабар қилинганди. Шунингдек, Роман Абрамович «Челси»ни қанчага сотиши ҳақида хабар берилди.