Ўзбекистонда банклараро пул бозоридаги фаоллик 2022 йилнинг биринчи чорагида 1,3 баравар ошди. Бу ҳақда Марказий банкнинг банклараро пул бозори шарҳида маълум қилинди.
Хабарга кўра, 2022 йилнинг январь-февраль ойларида банклараро пул бозоридаги ҳолат банк тизими умумий ликвидлигининг мавсумий қисқариши таъсирида шаклланган бўлса, март ойида иқтисодиёт субъектларининг девальвацион кутилмалари ортиши ҳисобига хорижий валютага бўлган талабнинг кўпайиши сабабли сўмдаги ликвидлик ҳажмининг сезиларли камайиши ҳамда ойнинг иккинчи ярмида пулкредит шароитлари ва операцияларига киритилган ўзгартиришлар фонида шаклланди.
Чорак давомида банклараро пул бозорида фаолликнинг ортиши кузатилиб, 2021 йилнинг IV чораги билан солиштирганда 1,3 бараварга ортди. Шунингдек, жами 27,7 триллион сўмлик операциялар амалга оширилди.
Бироқ, ушбу кўрсаткич 2021 йилнинг I чорагига нисбатан 22,1 фоизга кам бўлиб, умумий эффектив ликвидлик ҳолатининг 2021 йилнинг мос даврига нисбатан юқори бўлганлиги ва ликвидликка бўлган эҳтиёжнинг сезиларли қисми Марказий банкнинг пул-кредит операциялари орқали жалб этилган маблағларнинг қайтиши ҳисобига қопланганлиги билан изоҳланади.
Аввалроқ Ўзбекистон банкларининг пул бозоридаги фаоллиги бир йил олдинги кўрсаткичдан тушиб кетгани хабар қилинганди. Шунингдек, Ўзбекистондаги энг фаол банклар ҳақида хабар берилди.
