Иқтисодий тадқиқотлар ва ислоҳотлар маркази Ўзбекистоннинг 2022 йил 1-чорагидаги энг фаол банкларини аниқлади.

Маълум қилинишича, 2022 йилнинг 1-чорагида «Ипотека Банк» энг катта ўсишни кўрсатди. Банк рейтингда 6 поғонага юқорилаб, 3-ўринга кўтарилди. Шу билан бирга «Ҳамкор Банк» умумий рейтингда 2 поғонага пастлаб, 4-ўринга тушди.

Қайд этилишича, 2022 йил 1 март ҳолатига республика банк тизими активлари 436,8 триллион сўм (2021 йил 1 март ҳолатига нисбатан ўсиш — 19,3 фоиз), мажбуриятлари 365 триллион сўм (ўсиш 19 фоиз), кредитлари 327,2 триллион сўм (ўсиш 16,8 фоиз) ҳамда депозитлари 148,4 триллион сўмни (ўсиш 31,2 фоиз) ташкил этди. Ҳозирги кунда банк тизимида 57 мингга яқин киши фаолият олиб бормоқда.

Марказ тадқиқотида банклар икки гуруҳга бўлинган — катта ва кичик. Рейтинг ушбу гуруҳларнинг ҳар бири учун алоҳида-алоҳида тузилган. Шу билан бирга, кичик банклар гуруҳига фақат Тошкент шаҳрида (ёки фақат битта вилоятда) фаолият юритувчи банклар киради.

Таъкидланишича, 17 та йирик банклар учун тузилган умумий рейтингда «Траст банк» 1 поғонага кўтарилиб, 2-ўриндан жой олди. Мазкур банк даромад олиш салоҳияти, активлар сифати ҳамда ликвидлилик бўйича етакчи банклардан бири бўлиб келмоқда.

Шундай бўлсада, рейтинг натижалари «Траст банк» молиявий оммабоплик кўрсаткичларига, хусусан ҳар бир филиалига тўғри келувчи кредит олган юридик ва жисмоний шахслар сонини оширишга эътибор қаратиши лозимлигини кўрсатмоқда.

Трансформация ва хусусийлаштириш жараёнидаги давлат улуши мавжуд банклардан «Ипотека банк» 6 поғонага юқорилаб, 3-ўринга кўтарилди. Ушбу банк молиявий оммабоплик етакчиликни сақлаб қолиш билан бирга, бошқарув самарадорлиги, ликвидлилик, активлар сифати ҳамда капитал етарлилиги ижобий натижаларга эришди.

Банкнинг молиявий воситачилик бўйича рейтинги муддатли депозитларнинг кредитларига нисбатини янада ошириш, бошқа банклар ва молия институтларидан олинган маблағлар ҳамда Молия вазирлиги олдидаги мажбуриятлари бўйича кўрсаткичларини яхшилаш лозимлигини кўрсатмоқда.

«Ўзсаноатқурилишбанк» умумий рейтингда 3-поғонага кўтарилиб, 10-ўриндан жой олди. Мазкур банк бошқарув самарадорлиги бўйича етакчилик қилаётган бўлса, даромад олиш салоҳияти ҳамда ликвидлилик кўрсаткичлари бўйича сезиларли ижобий ўзгаришлар кузатилди.

Банкнинг молиявий воситачилик ва оммабоплик бўйича кўрсаткичлари муддатли депозитларнинг кредитларига нисбатини ошириб, бошқа банклар ва молия институтлари ҳамда ҳукумат олдидаги мажбуриятларининг умумий мажбуриятларидаги улушини камайтиришга алоҳида эътибор қаратиш лозимлигини кўрсатмоқда.

Қайд этилишича, хусусийлаштириш жараёнидаги банклардаги ўзгаришлар ҳамда банк тизимида рақобат муҳитининг кучайиб бораётгани хусусий банкларни ҳам янада ривожланиш, инновацион молиявий маҳсулотлар ва хизматлар борасида изланиш лозимлигидан далолат бермоқда.

Ўзбекистондаги 14 та кичик банклари фаоллик рейтингида «Даврбанк» ва «Зираат банк» ўз ўрнини сақлаб қолди. Шунингдек, «Анор банк» ва «Пойтахт банк» ўзаро ўрин алмашди.

Аввалроқ тижорат банклари январь ойи қанча валюта сотгани хабар қилинганди. Шунингдек, Ўзбекистон банкларининг пул бозоридаги фаоллиги бир йил олдинги кўрсаткичдан тушиб кетгани ҳақида хабар берилди.