Буюк Британиянинг энг бой одамларидан бири Жим Рэтклифф Роман Абрамовичдан 5,3 миллиард долларга «Челси» футбол клубини сотиб олишни таклиф қилди. Агар келишув амалга ошса, бу спорт жамоасининг тарихдаги энг қиммат харид бўлади, деб ёзади The New York Times.

Рэтклифф клубни «чиройли ўйин мухлиси сифатида» сотиб олмоқчи экани ва буни даромад олиш воситаси сифатида кўрмаслигини айтди. Ўз таклифининг бир қисми сифатида у 10 йил давомида «Челси»га 2,1 миллиард доллар сармоя киритишга ваъда берди.

Маблағлар, жумладан, «Стэмфорд Бридж» стадионини реконструкция қилишга йўналтирилади — бу Абрамовичнинг клубни сотиш шарти эди.

«Биз Лондонда шаҳар мақомини акс эттирувчи клуб бўлиши керак деб ҳисоблаймиз», — деди Рэтклифф.

У клубни «Реал», «Барселона» ёки «Бавария»га тенглаштириш ниятида эканини қўшимча қилди.

«Жамоага сармоя киритишда давом этамиз, шунда бизда дунёнинг энг зўр футболчилари, мураббийлари ва эркаклар ҳамда аёллар жамоалари учун ёрдамчи ходимлар рўйхати юқори бўлади», — деди Рэтклифф.

Агар келишув амалга ошса, Рэтклифф украиналикларни қўллаб-қувватлаш хайрия жамғармасига яна 3,1 миллиард доллар ажратиш мажбуриятини олади.

Клуб сотилиш жараёни атрофидаги вазият

Таъкидланишича, «Челси» учун энг яхши харидорни топиш жараёни бир неча ҳафтага чўзилган, Рэтклиффнинг кутильмаган таклифи бошқа аризачиларга хуш келмаслиги мумкин. Таклиф этилган сумма бўйича у клубни сотиб олишга даъво қилган камида учта миллиардернинг таклифларидан ўзиб кетди.

Савдо иштирокчилари томонидан якуний таклифларни топшириш муддати бир неча бор узайтирилди ва шу ҳафта охирида пойгадан чиқмаган учта инвестиция гуруҳига таклифларини яна 600 миллион долларга ошириш кераклиги айтилди.

Рэтклиффнинг спортга киритган сармоялари

Forbes Real-Time маълумотларига кўра, Рэтклиффнинг бойлиги 29 апрель ҳолатига кўра 15,2 миллиард долларга баҳоланган. «Челси»ни сотиб олишга уриниш миллиардернинг спортга киритган биринчи сармояси эмас.

Рэтклифф Франциянинг «Ницца» футбол клубига ва Швейцариянинг «Лозанна» жамоасига эгалик қилади. Бироқ «Челси»ни сотиб олиш бутунлай бошқача маънога эга — Рэтклифф жамоанинг дунёнинг элита жамоалари орасидаги ўрнини сақлаб қолишга ваъда берган.

Абрамович Буюк Британия унга нисбатан санкциялар киритгач, «Челси»ни сотувга қўйишга мажбур бўлди. Миллиардер клубга қарийб 20 йил эгалик қилган.

Абрамович хайрия жамғармаси ташкил этишга ва жамоани сотишдан тушган соф даромадни унга йўналтиришга ваъда берди. Ҳозирда клубни жамоанинг хайрия жамғармаси васийлари бошқаради.