Миллиардер Уоррен БаффетнингBerkshire Hathaway компанияси июнь ойида Occidental Petroleum нефть компаниясининг яна 9,6 миллион дона акциясини 529 миллион долларга сотиб олди. Бу ҳақда The Wall Street Journal АҚШ Қимматли қоғозлар комиссияси маълумотларига таяниб ёзмоқда.
Нашрнинг таъкидлашича, битимлар икки кун ичида якунланган ва Баффетнинг Occidental’даги улушини тахминан 16 фоизга ошган. Berkshire Occidental Petroleum’нинг энг йирик акциядори ҳисобланади.
Баффет компания тақдимотини томоша қилгани ва Occidental бош директори Викки Ҳоллубнинг режаларидан ҳайратда қолганини айтганидан кейин, февраль ойи охирида компания акцияларини сотиб олишни бошлади.
Occidental’нинг февралдаги ҳисоботидан бир неча кун ўтгач, Berkshire ўз улушини тезроқ сотиб олишни бошлади. Тахминан икки ҳафта ичида Баффет компанияси 14 фоиз акцияга эга бўлди.
Occidental ҳақида
WSJ таъкидлашича, Occidental акциялари йил давомида 92 фоизга ўсди, бу худди шу даврда 21 фоизга тушиб кетган S&P 500’дан анча олдинда.
Бошқа энергия захиралари сингари, Occidental ҳам Россиянинг Украинага босқини бошланганидан кейин нефть нархининг кескин ошишидан фойда кўрди.
Маълумот учун, Occidental Petroleum Corporation — АҚШ нефть компанияси. Бош қароргоҳи Лос-Анжелесда жойлашган. Forbes’нинг дунёдаги энг йирик компаниялар рўйхатида Occidental 276-ўринни эгаллади.
Мавзуга доир:
- Уоррен Баффетнинг компанияси бозорлардаги пасайиш фонида бир нечта компаниялар акцияларини сотиб олди
- Уорен Баффет фонд биржаларидаги вазиятни қимор ўйнашга қиёслади
- Уорен Баффетнинг компанияси HP’нинг энг йирик акциядорига айланди
- Уоррен Баффет билан кечки овқат қилиш имконияти рекорд суммага сотилди
